廣告

【胡.說樓市】2018奇則大全!邊個盤最騎呢?

2018年將盡,如果要形容香港樓市發展,「納米」呢兩個字一定走唔甩!新盤愈劏愈細,更出現128呎「龍床盤」嘅奇則,究竟2018年奇則有幾奇?邊個盤最騎呢?

去年初港島「南津迎岸」以181呎登出新例後港島第二細位後,接力九龍、新界樓也奇則處處。無非透過總價低效應,去催谷市場購買力,只是估不到發展商為求賺盡,納米樓也可以起得如此過份。

別以為「龍床盤」128呎呃秤,痴著「龍床盤」毗鄰的141呎單位,雖然面數比「龍床盤」大13呎,但只要細心望望,會發現內櫳百分百相同。唯一分別是周邊厚牆身,面積較大的單位,一邊外接後樓梯,300毫米厚牆身向外延伸比例多,直接壓縮單位實用性。

好老實,厚牆身影響實用,過去不受重視,因為區區幾呎牆身也計較,顯得吹毛求疵。但當新盤降至只得百零呎時,幾呎牆身影響卻舉足輕重。

同一道理,將這個概念發揮到極致,回首2018年,鐵路上蓋康城站「MALIBU」是其中之一。樓盤「主力牆」厚到425毫米,不止較一般屋苑主力牆300毫米厚得多,三房單位包五幅厚牆身,一律計入實用面積,最荒唐是主人房內驚現800毫米厚柱,量化之下更見誇張。

其二就是朗屏站「朗城匯」。明明1A座A室實用579呎,比隔離B室實用496呎,大83呎。但扣除多了一條52呎的走廊外,還有31呎的空間也全數隱藏牆身內。兩部份空間值過百萬,夠付「朗城滙」入場單位六成首期。

現時樓市仍然調整中,究竟2019年樓市同新盤又會點發展?我地繼續密切留意,2019年再見!