【胡‧說樓市】「香島」驗樓大發現！露台門差啲夾死詹SIR！？

筲箕灣豪宅「香島」新入伙，單位平均近2,000萬，當然唔係人人住得起，但連個露台都唔係人人企得起，詹SIR出露台驗一驗，更差啲被夾死，有無咁誇張先？ 翻查樓書，34呎露台闊3.7米，剛好橫跨整個客飯廳，但深度卻因此不足0.85米，採用摺門令成件事弄巧反拙，搞到業主難以出入。無論打開露台門行出去，或者走出露台後，想返回室內，都令人無辦法讚得下這種設計。所以縱然外望半山半樓景，可俯瞰整個筲箕灣，也夠高避過樓下長命斜車聲噪音問題，但露台功能卻未能發揮到盡。 實用1,228呎單位，擁有接近260呎巨型客飯廳，各自空間相當充裕，只是大門一入的玄關，雖具氣勢，但設計上卻值得改善。詹Sir指，門口玄關位是放鞋櫃的好地方，這個位置最適宜放鞋櫃，但卻將對講機及兩個燈掣放了在這位置，不方便放一組鞋櫃。他建議，將對講機及燈掣改放對面牆身，鞋櫃設計上可更具彈性。 沿客廳中間的長走廊直入，四間房統統歸向一邊，房間也並非迫迫狹狹的一類，有足夠空間可放雙人床及衣櫃。直入到尾主人套房，兩邊接近全落地玻璃窗，透光度十足，也將室外景觀引入室內，開則上無需挑剔，但地板鋪砌卻多有鬆脫情況，需要工人其後執修。 港島區、貴價豪宅，往往反映於廚廁用料，只可惜發現的問題比客飯廳更多，也直接影響整體交樓質素。請繼續緊貼《胡．說樓市》及《YAHOO財經》平台的樓市節目，我們下集集中看看豪宅廚廁有幾豪華、以及交樓標準又是如何？