【胡．說樓市】長實「星漣海」交樓！名牌家電都出事！？

豪宅氣派，超過千二呎的單位，長實馬鞍山白石「星漣海」交樓，氣勢由入屋開始反映出來。廚房三邊上設廚櫃增儲物空間，下放焗爐、洗衣機，仲有迷你紅酒櫃，件件名牌。不過詹Sir一驗，竟然名牌家電都出事！？有冇咁黑仔……

驗樓師詹濟南打開廚房抽油煙機，發出強勁聲響。透過廚櫃借力爬上去，詹Sir將紙巾攝於抽油煙機近天花的管槽邊、以及假天花位，紙巾隨抽油煙機開動而左右飄搖，證明抽油煙機管槽有漏風，要維修。

近廚房門口旁豎立的也是名牌雪櫃，但細心望望，雪櫃門地下有灘水漬，詹Sir認為係雪櫃漏風，需要維修。

單位四房一套連工人房，主人房設於客廳旁，要先經一條浪費位置的小走廊，才見到主人房內櫳的寬闊，然而這條走廊，卻跟客廳牆身一樣，有大範圍鬆批盪。

單位還有多個地方斜地台，最嚴重莫過於厠所右手邊的客房。由牆身一端去至另一端，一級比一級斜，成為最大失分位。

以至單位鋪磚手工及石材，也值得業主多加留意。例如客廳旁露台，欄杆右邊磚有空鼓外，塊塊地磚也鋪得高低不平。

去到主人房套厠的浴缸旁的石材，有大範圍的崩花污漬，部份夾口就有孔，成件石材都貼滿黃紙。

驗勻全屋， 石材、鋪磚、地台都是失分較多地方，其餘欄杆、假天花細項取得滿分力保不失，單位得到82分，屬於良好級別。

發展商長實回應指，在驗樓後的第二天已收到業主的執漏清單，承建商已完成執修，業主也簽署確認滿意。