【胡‧說樓市】豪宅「香島」驗樓得80分 設計衰粗心大意

豪宅身價，除了地段，廚廁都落重本。同樣南豐出品，屯門上車盤「豐連」設計樸實，筲箕灣「香島」則明顯高檔得多。不過用料貴都唔等於完美無瑕，「香島」今次驗樓得80分，僅僅守住B級，設計上仲有啲粗心大意，究竟咩事？ 驗樓單位廚房用雲石堆砌、三邊寬而闊的廚櫃映襯，一望就知豪宅貨色。置中特大洗手盆，左邊煮食爐頭，廚櫃底設有紅酒櫃，近門口有高身入牆雪櫃，旁邊拉開具層架的組合櫃可放碗碟。 廚房直入的工人房算闊落，只是工人廁所門安裝欠理想，壓實了底部的膠條，所以移動廁所門時會郁動了膠條，很難推得動，要很大力才可以關上。 實用1,228呎的單位，巨型客飯廳搭露台彰顯豪宅地位，走廊直入睡房對面就是客廁。洗手盆旁有入牆層架擺放潔具，設計上看似照顧周到，但望一望地下，感覺卻未如理想。地台去水對正洗手盆剛好對出的位置，企在這裡並不舒服，其實發展商有條件裝在廁所邊或櫃底。 走入主人套房的廁所，雙洗手盆、企缸浴缸並存，都是豪宅常見設計，但設計卻欠周全。浴缸缸邊位置預留了生口位，生口跟浴缸出現一條隙縫。這條隙縫有機會導致使用企缸時，水流會流向浴缸底，積水隨時流向其他單位，或下層單位。 浴缸跟坐廁之間有一個硬身金屬門頂，戶主洗澡後走出很容易絆倒弄傷腳趾。 套廁連接的工作平台面積約有16呎，但細心留意喉管無鎖上喉碼，詹SIR相信是喉管過長，不夠位在牆身加裝喉碼，索性放在工作平台欄杆旁就算。 總結驗樓結果，全屋在鋪磚、地板、潔具等環節扣分較多，只得批盪、地台、欄杆、家電及假天花力保不失，單位總分有80分，僅僅守得住B級級別。