Yahoo 行動版

43人追蹤

【星級理財】狄以達創裝修配對平台 分享年輕創業夢

狄以達最廣為人知嘅,一定係佢練得一身好「舞」功!佢喺20歲出道,出道無耐就成立咗自己嘅跳舞學校,依家係四間跳舞學校嘅校長,兩年幾前仲同朋友夾份創立咗室內設計網上平台。

今次佢上嚟接受Yahoo訪問,就分享咗佢嘅創業之路。佢話創立室內設計網上平台,一方面係因為自己鍾意做IT,另一方面係因為主持咗《安樂蝸》一段時間,發現呢個行業有好多運作上嘅問題。就好似客人喺搵室內設計方面無從入手,啲師傅有能力有技術,但又無渠道搵客人。狄以達於是創立咗呢個室內設計網上平台,為雙方進行配對,平台仲會有工程進度表和統一的報價單提供,希望可以完善溝通嘅渠道。

狄以達仲話,依家啲人對網購嘅信心大咗,少至幾百,多至幾萬蚊嘅貨品或服務都會上網買,甚至過百萬的項目都會上網查資料。而佢間公司呢兩年幾處理過嘅項目,價單就由30萬至200萬元不等。

最後,佢仲分享咗喺創業路上嘅理財小貼士,佢建議想創業的朋友畫一棵樹,將遇倒嘅問題和解決辦法一一寫落嚟,咁就可以令自己頭腦更清晰喇!

想聽狄以達嘅創業故事,唔好錯過呢集【星級理財】喇!