Yahoo 行動版

18人追蹤

【星級理財】林秀怡曾為養家賣避孕套 苦盡甘來開餐廳做老闆

嚟到下集,林秀怡分享自己嘅另一個身份,佢除咗係一個演員之外,仲係一間手工意粉餐廳嘅老闆娘。

佢分享自己嘅創業經過,原來係無心插柳。全因一個朋友好鍾意煮嘢食,仲要煮得好好味,佢遊說朋友開餐廳,點知朋友預埋佢份做老闆。最終餐廳由三個人夾份,總投入資金大約一百萬,佢做細股東,亦樂於乖乖聽大股東嘅話。

佢話最初開舖,主要做花瓶嘅角色⋯⋯即係做樓面,因為最簡單。仲話好搞笑地,粉絲總係喺佢無化妝嘅時候嚟搵佢合照。到依家熟習咗環境,開始涉獵唔同嘅工作範疇,譬如入廚房幫手煮嘢食,總之邊度缺人,邊度就見倒佢。

佢諗返最辛苦就係啱啱開舖嗰陣,因為人手不足,又咁啱拍緊《婚姻合伙人》,嗰排日日都無時間瞓覺,一拍完劇就返店幫手,做到凌晨兩、三點。結果有日終於捱唔住發燒,攤喺度咩都做唔倒。

餐廳開業至今三年幾,秀怡話大致收支平衡,但未回本。佢亦唔心急,明白投資嘅嘢急唔嚟。佢話唔應該抱著太負面的心態去做生意,相信做多一、兩年就可以回本。

最後佢講到,原來喺開餐廳做老闆之前,佢曾經喺網上賣避孕套。佢話嗰時已經喺TVB工作,但因為唔係日日有工開,當時又聽朋友講話有隻日本避孕套好好賣,於是就喺日本運返嚟轉售。可惜最終避孕套滯銷,因為香港好快就全線有售。最終嗰批避孕套由一位TVB同事幫佢掃晒⋯⋯

之後佢又分享自己嘅「星級理財小貼士」,就係要俾自己喺開心嘅環境下工作,咁樣先可以事半工倍。

想睇秀怡分享佢創業嘅甜酸苦辣,快啲嚟睇呢集【星級理財】!