【雪嶽山遊記】兩日一夜冰雪之旅 釣冰魚遊白樺林

今年香港天氣反常，冬天仍然未有過往嚴寒天氣，對於好多喜歡冬天嘅朋友，旅遊係其中一個滿足自己嘅方法！大家或者有見過冰上垂釣，於結滿冰嘅湖面上，穿開一個小洞，放下魚餌等魚上釣，不過好多時呢啲活動只限於南極、北極甚至北歐，全部都好遠！但原來近近地韓國，一樣有得玩，今日帶大家去一個江原道麟蹄郡兩日小行程，大家可以過一個極具特色冬日之旅！

Day 1

上午：乘車前往麟蹄郡

於首爾可在「東首爾客運站」乘坐直通巴士前往麟蹄郡，車程約兩小時。麟蹄郡位於韓國最北一個郡，毗鄰38線，位雪嶽山國家公園的一部分，冬天天氣寒冷，經常落大雪。

中午：冰魚節大玩冰上垂釣

麟蹄郡每年一度，1月中至尾就會有「麟蹄冰魚節」， 當天全村進入節慶模式！大家除咗可以於當地人安排嘅冰上垂釣區，購買釣魚用具就可以免費嘗試冰上釣魚，向冰層下極清潵湖水中的肥美鮮魚出手！如果怕凍，可以選擇付費進入帳篷入面釣。另外節日期日，有極多壯觀冰雕於村莊內，而村民亦會提供各種娛樂，例如雪雕冰服體驗、雪橇、溜冰、水陸兩用車等玩意，全部平日都難以玩得到呢！

冰魚節每年一度吸引好多本地及海外遊客前往！

每年都有好多遊客專誠試冰上垂釣！

節日有眾多活動，包括煙火等。

麟蹄冰魚節

地點：江原道麟蹄郡南面富坪里555-2號

日期：2020年1月18日至27日

.

晚上：嘗真正「冰鮮魚」！

大家喺香港成日聽「冰鮮豬」「冰鮮雞」，都係啲唔生鮮嘅產品，不過去到麟蹄郡就個個必定要食冰鮮魚，講嘅係真真正正於冰下釣出嚟，即場食嘅鮮魚！好多餐廳會提供魚生，即釣即劏即食，魚肉極鮮嫩彈牙！就算唔食生嘅朋友一樣可以食蒸魚、炸魚、冰魚粥、涼拌冰魚等多種食法。除冰魚以外，大家都一定要試埋用雪嶽山冰川水釀成嘅韓國米酒，飲一杯已經有驅寒之效！

麟蹄郡擁有一眾餐廳可以食到冰魚料理。

怕食生嘅朋友都有好多煮熟嘅料理可以選擇！

即釣即劏，即食生切冰魚料理。

冰魚料理

麟蹄郡餐廳推介：按這裡

.

Day 2

上午：白樺林賞70萬棵樺樹

雪嶽山為韓國之國寶山峰，當中有無數絕景，其中位於麟蹄郡之中部分，就有一個遠近馳名，深得韓國人歡心嘅地方，就係白樺林！自1974年開始於137公頃中種植咗近70萬棵白樺樹，每年一到1月開始，漫山遍野都係冰雪舖蓋嘅白色森林，尤如令人置身北歐森林一樣！呢個白色森林曾經出現過於唔少韓劇之中，可以話係浪漫代名詞，好多新婚或者結婚夫妻都專誠嚟拍婚照！

白樺林擁有70萬棵白樺樹，非常壯觀。

每年冬天，白雪覆蓋，令人尤如置身北歐森林。

雪嶽山無數絕景之中，白樺林可以話其中一個殺食景點。

白樺林

地點：江原道麟蹄郡麟蹄邑院岱里白樺林

.

下午：草泥馬牧場伴遊雪山

草泥馬有邊個唔鍾意呢？原來位於江原道呢個2017年先新開嘅牧場，有成36萬平方米，好多人會選揀成為麟蹄之旅最後一站。草泥馬樂園之中，遊客可以自行接觸放養於牧場嘅過百隻草泥馬，可以餵飼之餘仲可以拖住佢周圍走，踏入雪地、森林之中，好好培養感情。樂園為親子樂園，當中尚有好多兒童遊樂設施，例如小火車、旋轉木馬等，為一家大細必去之地！

草泥馬樂園可以同放養草泥馬一齊玩。

小朋友、大人都鍾意草泥馬；實在係好得意！

冬天冷冰冰，抱住毛茸茸嘅草泥馬夠暖！

草泥馬樂園

地點：江原道洪川郡化村面楓川裏 310

營業時間：10AM至6PM

.

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！