【今年去邊好?】2020年10大潛力旅遊地 頭三位都係亞洲?

作為旅遊精,肯定大家大大話話都去過唔少地方,不過有時大家或者會好狹隘咁諗仲有咩地方未去過。唔使諗得咁辛苦喇,因為旅遊預訂網站Skyscanner就過去一年用戶搜尋量嘅上升趨勢,選出2020年新興旅遊地Top 10 ,即係話以下呢10個目的地一定會係今年大熱,有心的話真係早少少訂定機位同酒店,隨時無位呀!

第十位:丹麥哥本哈根

比去年上升10位,北歐其中一個最熱鬧旅遊城市,充滿北歐童話式風格建築,城市規劃好、交通暢順、人民質素高等,都係哥本哈根吸引遊客之處;好多香港遊人嘅歐洲之旅,都係由呢個城市作為起點,難怪排名上升。

最佳旅遊月份:3月至5月,7月至8月

第九位:希臘雅典

希臘首都雅典都開始成為港人旅遊地點之一,擁有千年歷史古城可以話係浪漫之城,成為唔少香港情侶、夫妻作為旅遊及渡蜜月之理想地方。當中嘅古城廟宇、古羅馬街道建築等,都只限於雅典獨有!

最佳旅遊月份:3月至5月,9月至11月

第八位:德國慕尼黑

講起德國,大家首先諗起可能就係飲啤酒以及聖誕市集!而講起德國啤酒節,當然就係發源地慕尼黑啦!慕尼黑排名比去年上升15位,香港人除咗去飲啤酒,仲好欣賞當地藝文生活及郊外美景呢。

最佳旅遊月份:3月至5月

第七位:瑞士蘇黎世

蘇黎世為歐洲最富裕城市之一,當然發展得有聲有色,加上擁有阿爾卑斯山景色、蘇黎世湖美景等得天獨厚景觀;加上香港人愛Shopping,瑞士大量特產例如朱古力、時裝、名錶等,都令港人愛不釋手!

最佳旅遊月份:7月至8月

第六位:西班牙巴塞隆拿

比往年搜尋量提升40%,可見呢個西班牙城市幾受香港人歡迎;位處加泰隆尼亞自治區首府,擁有相當獨特嘅文化及建築,加上充滿拉丁風情街道、美食、沙灘,仲有足球!另外唔少航空公司都好多機票優惠,難怪排名上升。

最佳旅遊月份:5月至6月、9月至10月

第五位:土耳其伊斯坦堡

土耳其為近年國際唔少知名旅遊KOL心水地點,連帶當中美景例如藍色清真寺、棉花堡等充斥社交媒體。上年搜尋量急升49%,對於呢個位處亞洲及歐洲之間嘅古城,大家都十分有興趣呢!

最佳旅遊月份:3月至5月、9月至11月

第四位:日本岡山

日本唔少縣大家都應該去過,不過估唔到位處中國地區嘅岡山成為日本人氣王,岡山於日本有「晴之國」之稱,全年風和日麗、氣候怡人,因而盛產水果,加上大量文青Cafe、民宿,難怪吸引港人。

最佳旅遊月份:6月至8月

第三位:韓國濟州

韓國係唔少港人熱愛旅遊國度,其中濟州搜尋量急升74%!濟州島位於韓國最南小島,當中四季各有不同花季,加上濟州大自然經常出現於唔少韓劇之中,更覺浪漫;而且仲可以自駕遊,非常方便呢。

最佳旅遊月份:11月至2月

第二位:泰國喀比

講起陽光與海灘,大家可能會諗起泰國,一眾渡假村之中,原來喀比呢個小島比往年搜尋量急增523%!位處泰國南部,水清沙幼而且有大量水上活動。加上近開通香港直航喀比客機,因為直上第二名!

最佳旅遊月份:11月至3月


第一位:越南富國島

去到2020年最具潛力旅遊地第一位,就係越南富國島!為越南最大島嶼,擁有超靚海灘及渡假村,比往年急升82位,搜尋量大增1,070%!富國島受惠於越南低消費關係,突然成為香港以及國際遊客最理想旅遊地!

最佳旅遊月份:11月至3月


【立即讚好】全新 Yahoo 旅遊 Facebook 專頁

Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!