黎諾懿撞板留疤痕搵太太救駕

黎諾懿自爆拍文戲受傷,真係估你唔到。
黎諾懿自爆拍文戲受傷,真係估你唔到。

藝人黎諾懿傾力演出的無綫劇《C9特工》正在熱播中,劇中親身上陣跳車、跳樓,還要拳打腳踢,打足全程都沒有受傷,反而衰在文戲身上!行入山窿時忘記烏低身,頭部撞木板即時眉心爆缸。

黎諾懿夥拍馬國明與高海寧(高Ling)合作的《C9特工》終於播出,諾懿飾演被組織遺棄的特工,全劇打不停,他說:「我喺呢套劇係特工高手,冇一刻唔打!高Ling都係高手,我哋每次見都要打。」又指拍此劇時無論身形或狀態,都是最弗時期,拍劇前更巧合地參加錢嘉樂舉辦的藝員武打進修班,令他學以致用,拍攝前經常幫高Ling試位:「嗰個時期好弗、好打得,2、3樓跳落嚟,跳車之餘又要踢又撻生魚,打得好甘同周身瘀,但我都唔介意。」

搵太太幫手磨皮

拍打戲難免會受傷,諾懿亦因此見「紅」,他說:「有受傷,唔小心個頭爆咗,但你估唔到係拍文戲時受傷!嗰場戲係我同高Ling一齊入山窿,自己忘記咗要烏低身,唔知額頭位有塊木板,無情力一撞就暈一暈,眉心位爆開咗滴晒血,傷口都有3cm咁大。可能打戲會好緊張,知道啲位應該點就點避,文戲就放鬆咗。」

受傷後,諾懿卻沒有入院,原來驚留疤,他說:「入院要縫針,但一要縫針就會有疤,又化唔到妝,好彩助手有隻好勁嘅膠布,粘性好強,佢每日都幫我黐,黐完再化妝就唔係好覺。(驚毀容?)都有做最壞嘅打算,好彩依家科技做激光都OK,眉心多一條痕啫!太太又係做美容,搵佢做激光或磨皮都應該可以。」