肥媽遇九霄驚魂嚇喊:老公部呼吸機喺上面

肥媽遇九霄驚魂嚇喊:老公部呼吸機喺上面
肥媽遇九霄驚魂嚇喊:老公部呼吸機喺上面

藝人肥媽(Maria Cordero)昨日由英國飛馬來西亞,起飛不久遇飛機故障,機長透露引擎撞到雀仔,只可用一個引擎降落,肥媽嚇到魂魄唔齊,之後飛機安全落地後,肥媽在機上拍片講感受,還留言:「飛機故障要原機折返,嗰一下真係好擔心好緊張,好驚心動魄的一程機,以為可以順利飛到,結果飛咗一個鐘都有故障。第一次遇上咁的意外,真係好驚好緊張,好彩老公喺我身邊,感恩最後都順利可以返倫敦,平安到步。」肥媽不忘多謝機組人員,表示折返倫敦後再入住機場附近的酒店,佢話:「搞掂晒啲嘢,依家喺酒店瞓一陣,晏啲再飛過。」肥媽表示心情依然未能平復:「依家都仲驚緊,當知道飛機有事心諗好多好多嘢,好驚返唔到嚟。」

今日肥媽終於成功抵達馬來西亞,但一波未平一波平又起,佢再次拍片報平安,但成個人喊晒,佢話:「今次旅程驚喜一浪接一浪,係驚多過喜,知道大家的擔心,剛剛到了KL,同大家報個平安,呢次的旅程簡直驚喜一浪接一浪,係驚多過喜,頭先可能我同老公唔夠瞓,一落機匆忙得濟,漏咗老公的呼吸機同藥,全部漏低喺飛機上面,我太大意了..... 我太唔小心了......年紀大,真係唔嚇得,未必所有人會知,因為老公的病關係,肺同呼吸其實唔係咁好,所以呼吸機同藥有起事上嚟係要嚟救命,所以依家活多一日其實都賺咗,感恩同幸運地,好多謝... 好多謝...好多謝!」又多謝KL機埸同機組人員幫好快幫佢搵番啲藥:「可能全靠大家的集氣同祝福先會咁順利,只差一程機就順利返到屋企,希望一切順利,要大家擔心了。」