雅虎香港新聞 西環新開摩登素食餐廳 必試芝心豆腐漢堡+精緻紅咖喱魚
近年多咗人開始食素，西環堅尼地城呢間新開嘅新品素食餐廳就好啱茹素人士同朋友一齊去試，皆因餐牌會細心標註有無蛋奶或者五辛，菜式選擇亦夠多元化，有啲真係唔講都未必知係素食！必試招牌菜豆腐英雄，吉列豆腐扒配流心松露芝士醬好香口。
Sofia位於堅尼地城港鐵站附近，以素食同非素食者都可以共同享受為理念，裝修走清新田園風格，感覺舒適。菜式亦花咗唔少心機設計，無論係食材配搭定烹調方法都有新鮮感。
粟米菠菜芋頭片闊條麵（$88）
以香甜粟米為主角嘅意粉，醬汁味道香濃，有天然甜香又唔膩。闊條麵軟硬度適中亦夠掛汁。而且加咗自家炸嘅芋頭片，有原片亦有碎塊，香脆增加口感層次，一改素食味道單調嘅印象。
紅咖喱魚黑糯米飯（$138）
將素紅咖喱打成泡泡，唔單止賣相更精緻吸引，亦令素魚嘅脆皮唔會咁易變腍。雖然泡泡食落口感比較輕盈，但味道上無論係辣度同香氣都好夠！有八角、丁香、百里香等嘅香料味。
素魚係用黃豆製作，外面包一層紫菜再炸去模仿魚皮嘅口感，做到外脆內軟。配菜亦有水準，黑糯米飯軟糯有嚼勁，蘆筍爽口無渣。
豆腐英雄配薯條/薯蓉（$138）
招牌菜豆腐英雄其實係以自家製豆腐扒為主嘅Open Sandwich，吉列豆腐扒炸至金黃香脆，裡面唔單止有加咗洋蔥、杏鮑菇、西芹同香料調味嘅板豆腐，仲有用素芝士製作嘅流心松露芝士醬！松露同芝士本來就係絕佳配搭，加埋香料味道非常豐富。
而吉列豆腐扒同意式香草麵包中間再夾一層松露沙律醬，增加香氣。另一加分點係吉列豆腐扒上面嘅紅酒醋紫椰菜絲，味道微酸，一齊食嘅時候可以減少吉列豆腐扒嘅油膩感。唔好睇分量好似唔太大，其實食完真係幾飽肚！
鬼馬肉醬墨西哥脆片（$58）
鬼馬肉醬係用咗OmniPork新豬肉，加素牛肉、洋蔥、蕃茄、素芝士等製作，食落無論味道定口感都好似真肉醬！芝士同蕃茄香味濃郁，配搭口感香脆嘅粟米片，係令人忍唔住不斷食嘅惹味小食。
公平貿易滴餾咖啡（單點$48，跟餐$38）
飲品當中比較特別嘅係滴餾咖啡，係將濾杯、研磨好嘅咖啡粉同熱水分別奉上，畀大家自己手沖咖啡！拍攝呢款公平貿易係秘魯鐵比卡咖啡豆，沖出嚟嘅咖啡口感順滑，有柑橘酸甜風味，尾韻帶甜。
青瓜薄荷梳打（單點$38，跟餐$24）
餐廳亦有供應三款梳打特飲，青瓜薄荷梳打甜度適中，薄荷香味突出，口感清涼。
Sofia
地址：西環爹核士街28-32號安發大廈地下C號舖
文：Cathy
相、片：Tom Li
