尖咀新開5000呎日式精品超市 創意咖啡+健康沙律+手工飯糰+生活雜貨

尖沙咀又有新店出現排隊人龍，不過今次唔係過江龍或者Cafe，而係新開嘅日式精品超市谷辰 ！佔地超過5,000平方呎，加上裝修以日式自然風貌為靈感特別加分。而對喺附近返工嘅朋友嚟講，更加唔可以錯過裡面嘅兩大輕食專區，一個以咖啡同沙律為主，另一個主打日式手工飯糰，Grab & Go都可以食得有營又好味。

創意咖啡+健康沙律 THE SALFEE BAR

掃貨前先嚟一杯咖啡提提神，Dirty即係熱Espresso加上凍牛奶，所以記得盡快飲，享受一熱一冷嘅口感撞擊。咖啡係自家House Blend，有Fruity同Nutty兩款風味選擇。西柚紫蘇有氣咖啡就更加特別，用自家冷萃12-15小時嘅紫蘇咖啡，再加上西柚調配而成，果香清爽。

飲品亦有無咖啡因嘅選擇，抹茶同焙茶飲品都採用嚟自日本嘅高級茶粉，加上人手即場刷茶，令口感特別幼滑無粉粒。宇治抹茶拿鐵有茶香而且回甘明顯，而竹炭伯爵拿鐵就加入黑色嘅竹炭粉，凍飲有類似水墨紋嘅賣相，好啱相機飲先。

沙律現時有九款選擇，包括唔同口味例如韓式牛肉椰菜花碎、和風蕎麥麵、越式羽衣甘藍糙米等。最開心係可以隨意配搭兩至三款口味，中間更會以青瓜片隔開，叫多兩個同事一齊Share就可以試晒啦！

日式手工飯糰+便當 米角

品牌選用秋田小町米，人手製作唔同口味嘅飯糰，唔單止配料選擇多，連用嘅飯都各有不同！例如拍攝呢三款就分別係秋田小町米燒飯糰、以均衡營養為概念嘅五穀米飯糰，同富含抗氧化劑嘅養生黑米飯糰。包飯糰嘅紫菜係另外獨立包裝以免變腍，而且採用佐賀縣嘅有明海苔，質感比較柔軟、入口即化。

期間限定口味中間係流心效果超誘人嘅溏心蛋，半熟嘅香濃蛋黃加埋同時具有粘性同嚼勁嘅秋田小町米真係無得輸。而如果覺得Menu上面嘅口味都唔啱心水，仲可以揀自選飯糰，喺秋田小町米、五穀米、養生黑米中揀一款米再加心水配料。

四款指定口味嘅燒飯糰可以配搭昆布抹茶高湯變成茶漬飯！茶湯鮮味非常突出，而且夠熱好啱秋冬食。再伴以Wasabi、野薑、芝麻、日本米通同昆布增加口感同味道層次。

飯糰便當可以揀一款或者兩款飯糰，配搭野菜、料理小品、自家濃湯或靜岡玄米茶，賣相精緻之餘分量其實都唔細，當Lunch食完七至八分飽就啱啱好啦。

減少包裝概念雜糧專區 沢屋

精品超市當中以特別有一區以減少包裝為理念嘅品味生活專區，最搶眼嘅一定係呢排一筒筒果仁同雜糧。雖然而家因為疫情關係改用紙袋，但概念係及後大家可以自備容器嚟買需要分量！

慶祝新店開幕，亦特別推出數量有限嘅特選和香悅米禮盒，裡面有三款頂級日本米：埼玉彩之輝米、德島越光米、愛知之香米。加上精美木盒包裝，中秋送禮自用都得，得咗。

同時亦有嚟自世界各地嘅優質商品，例如本地代表就有上環PLANTATION by teakha嘅精品茶葉、細味公平嘅咖啡等。

精選各地美食+生活雜貨 超市專區

佔地5,000呎咁大真係有唔少選擇，從日本直送新鮮水果、蔬菜、急凍食品、酒類等應有盡有。好似最近就有唔少人嚟買金箔咖啡同罐頭飯，唔知係咪假期備糧呢？另外之前日本大熱嘅透明醬油呢度都有呀！

谷辰
地址：尖沙咀中間道15號H Zentre地下 01-02 號舖

文、相：Cathy