雅虎香港新聞 精神科醫生曾繁光：香港整個城市好焦慮 社會創傷如反送中 強迫症患者舊病復發
武漢肺炎疫情持續擴大，全港市民的日常生活都受到影響，人人都時刻關注疫情最新發展。精神科醫生曾繁光指：「等於嗰時反送中嘅社會事件，你越睇（相關資訊）就越沮喪。所以睇一次夠喇，你知道個社會發生咩事，算喇，唔好再睇。因為你再睇就越嚟越焦慮、越嚟越緊張，就會瞓唔到、情緒又唔好。」
曾繁光是執業醫生，他稱近來有好多舊病復發的病人找他，其中一個是強迫症患者。「佢嘅病就係會不停洗手，我哋醫好佢之後好多年無事，不過近來佢又唧吓唧吓啲酒精（搓手液），發現唔唧唔得，一日用成公升酒精，佢一路咁唧，唧到成手滴晒水嚟捽自己。跟住酒精用晒，佢又自己溝梘液嚟用，捽到自己成手都係泡。佢出唔到街，而家work from home，我話你喺屋企唔使洗、好乾淨，佢話唔洗唔安樂，一定要洗。嗰個係強迫嘅行為，佢知道自己唔係好妥，騰晒雞咁走嚟睇我，我又要俾返藥佢食，遲少少應該無嘢嘅。」
精神科醫生曾繁光在公立醫院執業逾廿年、2010年轉為私人執業。他形容香港整個城市整體好焦慮、節奏急促，香港人長期處於高度戒備的狀態。面對今次武漢肺炎來襲，他認為香港人汲取了2003年沙士的經驗，防疫做得好快，但因為疫症突襲加上沙士陰霾，精神上不免緊張。
市面口罩短缺，又有謠言令人搶米、搶廁紙，曾繁光解釋：「點解會信呢？因為你好焦慮就好容易相信咗人哋嘅說話，尤其是危害到你自己嗰啲，跟住就『唔好理喇，做咗先』，跟住大家咪一齊搶。而且搶嘅嗰啲人好奇怪，佢可能買廁紙擺屋企，一年都用唔晒。搞到最後因為你搶多咗人哋好多份，結果第二啲人就可能無得買。所以有句嘢講得好啱：『相爭不足，分享有餘』，夠用喇，可以唔買住。」
他也不建議排隊買口罩，因為這樣反而因為人群聚集增加染病風險。他說有朋友一家只剩一盒口罩，4、5個人用，每人獲發三個。在口罩裡面加一層紙巾，一日用一個口罩，用完的口罩擺信封，放在乾爽的地方，隔兩日重用。曾繁光指：「4個鐘換一個（口罩）就最完美，但香港人要學習彈性，可以接受不完美。」並指如非要到醫院，就不需要咁完美，但提醒，搭電梯、坐巴士、乘地鐵等，都應該戴口罩。
曾繁光又笑道，見過有人用文具店買來的手指套專門撳掣，每次用完就放入膠袋，回到公司或家裡就洗淨晾乾，「好得意，佢話，你屋企都有裝過藥丸嘅膠袋，都可以咁用。」另外就是「彈性返少少，廁紙可以慳啲用，無米咪食吓第二啲嘢，我都食咗好多餐意粉，哈哈哈哈哈。」
從他的觀察，有強迫症或焦慮症的人較容易因為疫情而再次出現情緒困擾，他一些多年無見的病人最近都再度求診，但曾繁光表示說不準舊病復發率是高是低，具體表現就是將所有事情當作戒條：「口罩一定要外科口罩、一定要跟足指示嚟戴、一定要點樣洗手、一定要酒精搓手液，所有嘢都變成一定一定要咁樣做。」
他建議大家要找方法令自己平靜下來，最簡單的就是深呼吸：吸一口氣，憋氣3至5秒，再慢慢呼出，每30個呼吸為一組，每天做三組。「再唔係喺屋企無嘢做，就上網睇吓有無一啲放鬆自己嘅方法，譬如有啲人教你瑜伽、正念呼吸方法等等，其實你跟住做已經慢慢放鬆到。」
曾繁光續說：「第二就係要夠瞓，充足睡眠好緊要，因為好多人喺屋企打機，又唔使返工，因為喺家工作嘅意思就係唔使工作。搞到三更半夜、癲倒日夜，其實嗰啲對你身體嘅抵抗能力、免疫能力都未必係一件好事，所以要堅持返一啲平時好嘅睡眠習慣。食嘢唔好太多、太少，屋企有個危險嘅，好多零食。猛食嘅時候，體重會增加，呢個又係唔係幾好。」
他相信，這次疫情是又一次對於香港社會造成創傷，「就算睇住電視不停咁播呢啲疫情，幾多人死、幾多人被感染，都有可能被創傷。所以要保護自己，就係唔好睇咁多。」就如反送中運動期間，許多人情緒受困擾，甚至患上創傷後遺症（PTSD）。
曾繁光認為：「如果政府做好少少，所有嘢都係好有計劃，話晒計劃俾市民聽，市民知道應該會點做、跟住做就得喇，但今次出現嘅情況呢，政府都唔聽專家講，搞到啲市民：喂，應該聽邊個話？聽特首話唔戴口罩，抑或聽專家話，到最後好混亂。」
但他續指，香港人向來都不信賴政府，即使是港英年代亦然，「靠政府就分分鐘乞米架喇，嘻嘻嘻，所以呢都係要靠自己。」他形容，即使政府好「屎」，但香港社會仍然可以運作，「政府如果發揮得唔好，我哋更加要發揮得好啲，每一個人都要發揮得好啲，彌補佢嘅不足，如果唔係就一齊死。所以唔好剩係鬧政府，我哋做好自己份內事。正正呢個制度好可愛嘅地方，唔需要好叻嘅人運作政府。」
香港紅十字會自去年10月開展「Shall We Talk」服務，本來的對象是「6.12」事件中情緒受困擾的市民，今年2月開始亦都歡迎在疫症中感到不安的市民預約服務。紅十字會指，由2月1日至2月18日，共收到13個關於今次疫情的求助，已經處理了4個個案。該會臨床心理學家林莉蓉接受眾新聞訪問，透露有求助者本身有焦慮症狀，疫症爆發後，經常用消毒噴霧清潔雙手，家人亦都無法理解他的行為，結果加劇了他的焦慮症狀。
林莉蓉表示，綜觀受助者的情況，焦慮症狀仍屬輕微。她又特別提到，相信正接受隔離的人士心情尤其鬱悶、無奈，建議他們可以每日為自己定下小目標、透過閱讀、看電影、寫作等保持心境活躍。紅十字會亦都另外製訂了一些「疫情中的情緒管理」貼士給一般市民、接受隔離人士和醫護前線。
另外，香港撒瑪利亞防止自殺會總幹事曾展國亦表示，每月收到的求助數字維持一千個左右，最近有少部分求助個案與疫情相關，但因為沒有具體分類，不知道確實數字。疫情相關的求助主要是擔心不知道疫情怎樣發展、撲口罩、撲生活用品亦都令到他們情緒緊張，另外就是不滿商家抬價、不滿其他市民囤積居其、不滿政府處理疫情的手法。相比起反送中運動期間的情緒問題，曾展國認為今次影響層面更闊，「本來覺得唔關事嘅人，想買嘢都買唔到。」亦都有人擔心有隱性患者在社區遊走，而正接受隔離的人士又會擔心自己染病、傳染給家人。
觀看原文： 按此連結
