雅虎香港新聞 【專訪】恨在瘟疫蔓延時──中大醫學院講座教授梁秉中
疫症碰上愛情，是史詩式巨著；疫症混入政治，可以是災難式慘劇。
身經百戰的醫學院老教授，比一般人更心裡有數。
78歲的骨科醫生梁秉中，是香港中文大學醫學院矯形外科創傷學系終身講座教授。他做過港區人大代表，17年前的春夏，卻率先帶記者北上到廣州6間醫院，揭發大陸已爆不明肺炎，但香港政府和醫管局遲遲不作危機處理。當沙田威爾斯親王醫院8A病房連環爆發，醫管局還不肯關閉急症室時，梁秉中在醫護集會上公開狠批，醫管局才後知後覺。
梁秉中是最老資格的中大醫學院教授，曾治療首個沙士病人骨枯。中大醫學院前院長鍾尚志，在立法會沙士聆訊時，曾說梁秉中「是我們的精神偶像」。
17年後當下的武漢肺炎，梁秉中這位老教授，近日行出街沒戴口罩：「我成個研究所得一盒，（他是中大中醫中藥研究所臨床研究中心總監），真係有事（大爆發時）點搞呀。就算我同佢哋講話要，都未必有得攞啦。」
「我去馬會食飯，有人見我呢個老嘢無口罩，我就話係呀買唔到，那個人差啲想俾一個我。」教授，真係買唔到？
「究竟，驚乜呢？」
是的，如今每天戴上口罩的香港人，真正害怕的，是病毒，還是沒戴口罩引來的奇異目光？
害怕，是否因為你的內心深處，對政府有著極大的不信任？
「應該話，係對政府的憎恨。」梁秉中嘆了口氣。
眼前的亂象，比17年前更不堪入目。全城恐慌之際，老教授想講一句：「不必過份擔心，但須小心。」
梁秉中叫大家「不必過份擔心，但須小心」，有四個原因：
（1）武漢肺炎病毒結構已證明極似17年前沙士病毒，感染過程亦像，因此疫情上落應似17年前。
（2）17年前香港經驗：傳染病過程是急升、平穩、下沉，應極具參考。樂觀假定：武漢肺炎將似港沙士前後20周，非常合理。
（3）沙士時，香港在最高峰期（4月），最高危的人士（醫院內工作者）感染率是0.4%。一般港人感染率應更低。
（4）經驗說明：疫情會下降，只要保護好自己（如醫護），染病不是必然的，應與流感一般。
梁秉中說：「官方政府、民間、專家，只是說香港試過好大鑊，今次都應該好大鑊，嚇死人。以前沙士發病是廣東，現在武漢比較遠。有人話，香港會變成第二個武漢，這個嚇人嚇得好緊要。」有說或140萬人感染？「這些慢慢就會水落石出，是否香港一下子變成武漢呢，你可以說要有警剔，但也需要有人講番一些事實吧。」
「好多人話今次（武漢肺炎）深不可測，但事實唔係，佢似沙士、MERS（中東呼吸綜合症），再看多一兩個禮拜確診數會否再升，之後是否慢慢回落，雙倍時間之後就會無晒。」他說，關鍵是未來一、兩周，「如果疫情拖拖拉拉，香港也可能有突發事件，並非一定跟疫症有關的，最差是有超級傳播人，社會出現打打鬥鬥亂晒籠，搶呢樣嗰樣。」
老教授擔心的，是當真正有大爆發時，政治問題會激起更大的社會亂象。
17年前，梁秉中最記得4月1日，網上有人訛稱政府宣布香港已成疫埠，坊間出現搶物資（當天也是張國榮離世，很多人說像世界末日）。當年的搶物資在政府澄清後，很快回復平靜。但17年後的今天，日日排長龍買口罩，物資搶完又搶，即使政府出來說了N次，大家都懶理。
點解，香港人咁驚，好像比17年前更驚？
梁秉中說：「因為大陸隱瞞，爆了出來被全世界指住鬧和懷疑；第二，手機資訊亂晒籠（2003年還未有智能手機），你嚇我我嚇你；第三，唔信任香港政府，根深柢固。」
「最有趣係，2003年4月1日的搶購，當時有900個病人在11間醫院；今天的搶購，只有數十個病人，主要集中在一間醫院。」
「2003年，我唔記得有冇人搶過口罩，但而家係未打到嚟已經搶，如果真係大爆發，每人自己做口罩都未必夠用。口罩呢件事，現在係炒到你唔戴會死、會累人。」記者聽過坊間有人說，其實唔係真係咁驚病毒，只係人人一口罩的氛圍下，唔戴出街會被人歧視，閒言閒語更難受；也有一位婆婆接受訪問時說，覺得行出街沒口罩「好醜」。
疫症之下，人的反應和心理狀態也會傳染吧？梁秉中認為：「點解會咁呢，大家炒作囉，政府都有份。政府順從民意嘛，民意話戴口罩，咪戴啦，但當大家鬧唔夠口罩時，政府卻沒出來解釋，係唔敢解釋。」
回到病理學ABC，武漢肺炎的傳染途徑，衛生署指：「經呼吸道飛沫傳播是新型冠狀病毒主要的傳播途徑，亦可通過接觸傳播。 」不是呼吸一下空氣也會中招，故梁秉中氣定神閒：「口罩係咪真係保護到你？口罩保護到要入醫院者、親密接觸者，但唔會係一般性的保護，唔會好似防疫針咁。」
老教授，唔係啊，那幾位成日出鏡的專家，姓袁、姓何、同教授一樣姓梁的，都話要口罩啊。「你要我出鏡的話，我都戴啦，點解標奇立異啫，沒時間解釋啦。你留意聽吓，專家都有言下之意。但口罩係唔係真係保護到你？好似無乜人問過呢個問題。事實上，在病毒保護的角度，是要去到手術室用豬咀的那一種先係真保護，其他是低層次保護。但社會沒可能有那麼多物資，700萬人日日換豬咀，點掂呀。」
「記得我話，沙士高峰時，最高危的醫護人員感染發病率，是0.4%。」
17年後，香港人再因為疫症戴上口罩，歲月流逝，我們腦袋多了智慧，內心也多了憤怒，不明白強國為何沒有好好汲取教訓，也不明白為何政府的抗疫工作，總是後知後覺。
與沙士比較，現在政府做成點？老教授話中有話：「邊有得比較架，政治唔係我哋書生專長，但當年政府唔認有疫症，由政府到醫管局都係咁，之後民間爆晒出來先嚴肅處理。17年啦，大家仲邊記得呀，或者陳馮富珍記得啲好嘢啦，因為佢因此飛黃騰達。」
「17年間，香港人對大陸嘅唔信任，可能差唔多都係咁唔信任；但對香港政府嘅唔信任，增加了N倍。」
「應該話，係對政府嘅憎恨。」
「而家個亂局好清楚啦，左、中、右嘅恐懼係一致。可惜，亦很可悲。」
「我睇到醫療界同僚的過分反應，如果唔係佢哋憎恨政府，冇必要有咁激烈行為。做得呢行，見過很多病人，知道什麼是疾苦，唔會輕易離開崗位。所以我係好相信，他們罷工不會長的，他們的commitment會勝過其他。」梁秉中說此話在上周五，醫護仍未表決暫緩罷工。
「我好同情佢哋，但我好相信行業有歸屬感，多多少少刻了在他們內心。同情，是覺得他們不必要地走了條政治路線，陪埋一齊急、一齊慌。我羨慕佢哋年輕，仍有機會盡責，能夠在前線係一種光榮，我呢啲老嘢都唔喺HA啦。」
醫護罷工，是因為林鄭月娥，是千絲萬縷的政治問題、遲遲不封關的問題，還有單是她處理口罩供應、個人戴口罩的舉動，便引起民憤。
「林鄭如果第一日就唔戴，我服佢。但之後又咁又咁，又話唔夠，又標奇立異，就係醜。完全沒政治智慧，明知故犯。」
「一個人，如果你覺得佢黑人憎，佢著件衫衰啲，你都要鬧佢啦。」
陳肇始呢？「唔好假定會有一個英雄，能夠帶領你出埃及，點可能。佢喊一喊，對佢自己形象好大幫助。你們沒惻隱之心，佢真係喊呀，唔係假，係真係唔知點好呀，有心無力。」
梁秉中認識林鄭月娥，「港英時代，佢喺好多部門都做過阿二，忠實地執行政策。」他記得，80年代末前衛生福利局局長黃錢其濂研究投放資源搞基層醫療，由港大醫學院楊紫芝教授領導的「基層健康服務工作小組」，1990年發布報告「Health for All, The Way Ahead」，詳細闡述了社區健康服務的運作，建議成立「基層健康服務管理局」（PHC Authority）。梁秉中是小組委員之一，林鄭月娥當時是衛生福利局首席助理秘書長，也是小組秘書。
「30幾年啦，我哋喊嗰位護士長，仲講緊基層醫療，而家先有試點，唔知幾時先開到張。你看這方面香港幾差，搞前哨站到而家都未搞到。」
「或者，行政力量高的人，政治力量是幼稚園；太有行政能力的人，面對政治困局，就搞出大頭佛。」
2003年，沙士10年，梁秉中跟記者說過：
「十年前，我們的官員將香港這個城市抽空來看，覺得大陸發生的事，燒到埋嚟至算；十年後，中港關係在政治上、社會問題上、意識形態上，都變得更複雜，但我們的官員，仍然抱着燒到埋嚟至算的心態處理，好似臨時臨急先話唔俾生仔、唔俾買奶粉。如果官員再係咁被動，再有一次沙士，後果自負。屆時將會更複雜、更一發不可收拾。」
17年後，政府是否仍然「燒到埋嚟至算」？梁秉中說：「而家係怕字當頭，怕瘟疫、怕上身、怕人鬧，邊個敢鬧佢成功機會極高。」即係燒到埋嚟都唔處理？「你講多幾句，佢咪處理囉。」
「點解今次坊間會出現種種亂象，因為極大政治化，政府必然有責任；全球來看，中國大陸意氣風發、一帶一路開始，得罪無數人，大家就覺得抵你死。」
「我哋做醫生嘅，只覺得無可奈何。」
沙士時，梁秉中是官員眼中釘，之後一段時間，他感覺到一些前官員和當年的醫管局中層，對他懷有心病。沙士之後他曾經提出，醫管局要為接收更多內地人來港求醫而作出規劃，卻換來醫管局高層敷衍：「我們已有準備工作在做。」
「單程證每日150個是問題，但政府沒法解決，醫管局也被動，而且愈來愈被動。醫管局以發展專科為上，專科之間欠溝通，有時將病人踢來踢去。但基層醫療卻遲遲未做，以致大陸來的人多了、窮人又多了，底層無法配合。」
政策與政治環環相扣。眼前要抗疫，點算好？「有信教者，要多祈求大爆發唔好嚟，雖然我都覺得機會唔大，但萬一出現，以咁樣嘅團隊，不得了。」
「我諗，好多人會走，避開啦。」
「就係因為唔信政府、憎政府。」
老教授在訪問中，不斷嘆氣。
梁秉中研究中藥多年，17年前，他向醫護人員處方了玉屏風散和桑菊予醫護人員作預防，有2600人選擇服用2周。「結果沙士完晒，一個都沒有感染。」後來有1000人參與研究，他發表了論文。他說，近日已提醒醫管局這條藥方。一般人食又得唔得？「唔使搶啦，玉屏風散要北方先有，唔好亂來。」
這是他可以做的。
觀看原文： 按此連結
