亞視製作部大裁員 邵子風慘受牽連:人事部根本就係亂咁炒人!

亞視製作部大裁員 邵子風慘受牽連:人事部根本就係亂咁炒人!

亞視又又又炒人啦!雖然亞視炒人已經不是什麼新鮮事,但這個在2017年已經「東山再起」轉型做網絡電視,曾經讓人一度以為它真係翻生!亞洲電視控股今日(28日)公布上年業績嚴重虧損8億人民幣(約9.3億港元)而大幅裁員,更將整個製作部「狠Cut」,消息指化妝、收音、攝影和廣播中心的員工全部被裁,製作部亦成重災區,19人炒剩4人,另人事部只剩一名員工,OTT的銷售部亦全部「起身」。

邵子風周四(28/3)中午在facebook,表示明天(29日)要為節目《發噏風》錄影,惟今日突然收到亞視將整個製作部連根拔起的消息。

他接受《香港01》訪問時表示公司想人做免費勞工:「我本身聽日約咗三個嘉賓錄三集,但佢今日已經炒人,製作部有冇咗,連攝影師都炒喎,但又想錄埋聽日嗰三集,佢哋向我提出一樣嘢:『聽日嘅節目,如果無錢(冇錢)俾你,你會唔會番黎(返嚟)錄?』」他聽完都覺得相當無奈,並將整件事跟其中一位嘉賓張松枝解釋,松枝搞笑地教他回應:「等我問吓我業主,中電,水務署,街市啲老闆,我先可以答到你。」邵子風之後亦要一一向其他嘉賓解釋並道歉。

隨後,有一位自稱知情的內部員工於28日晚上就此事澄清,表示由於當日太多人被炒,導致有人在傳遞上層訊息時出現錯誤:「本身傳消息出去嗰個人自己都俾人炒,佢知道公司cut節目,但因為已經約好嘉賓,所以俾人叫佢去問子風想唔想做埋個嘉賓,就以為冇錢畀佢,其實人地叫得你去問,就梗係留左錢畀佢㗎啦!」

管理層逢周五開刀 邵子風:係叫「亞視星期五」

他笑稱拍節目一年之間已經多次見證亞視裁員:「炒人呢件事好耐㗎喇!係成日不斷咁發生㗎!」雖然早已對今次的炒人風波見怪不怪,但仍然對今次的風波感到吃驚:「有同事打畀我同我講『嗌晒成個製作部入房喎,睇嚟有動作!』,我即刻睇一睇個日曆,今日星期四咋喎!因為一般亞視炒人係星期五㗎,我哋係叫亞視炒人呢樣嘢做『亞視星期五』,係好睇晒佢所有嘅節目㗎!」他更笑稱同事之間經常開玩笑要開拍「亞視星期五」,逢星期五訪問亞視員工問他們怕不怕被炒的心情:「唉,我都未拍到呢個節目就已經冇得做喇!」

人事部隨機「殺人」 員工不敢接「死亡電話」

他大爆公司內部一直「七國咁亂」,而人事部的做事方式更是令人費解:「人事部想炒人就炒人,例如佢想炒一個PA(Production Assistant),人事部就可能打電話畀PA甲,如果打極都冇人聽,咁就試吓打畀PA乙,如果PA乙聽電話,咁就炒PA乙㗎喇!所以亞視同事好多都唔敢聽公司電話㗎!」

一般的公司如要裁員都不會將工作能力高的人裁走,偏偏亞視與眾不同:「有個資深化妝師畀大老闆表揚佢做得好,點知第二日就畀人炒咗!因為讚佢嘅人同炒佢嘅人唔同,被炒嘅人都唔係畀老闆炒,而係畀人事部炒!佢哋根本就係交數!」

邵子風解釋自己並不是隸屬亞視的正式合約員工,只是以freelance形式拍節目,節目無端端被中斷非常無奈。(怕不怕收不到糧?)「我諗都唔會走我(走數)嘅,咁大間公司!」(有意與其他電視台合作?)「我好有興趣啊,但都要人哋要我先得㗎!我都已經慘到無嘢撈到要去撈亞視喇!我冇嘢撈喇求大家畀次機會啦!」

有一位匿名的前亞視資深員工表示,雖然在亞視改革後加入一年多已經見證至少8次裁員事件所以一早就有心理準備被炒,但仍感到相當無奈:「我到尋日都仲OT緊,幫佢哋寫嘢,仲幫佢搵嘉賓!」他更爆料亞視根本就不按正路作裁員決定,而自己則曾經被公司「誤炒」過:「當時有個人走嚟同我講,叫我執嘢走,然後我同我阿頭講我畀人炒咗喎,佢就覺得好荒謬,因為成組人得我一個寫稿,所以一炒咗我就會冇晒人寫稿,當時我做緊嘅四個節目都會冇人做!」之後他的主管向人事部問個究竟,結果人事部稱:「吓係咩係咩,哎呀寫錯咗啊,唔係炒你啊!」

前資深員工爆料:Marketing是毒瘤

另外,亦有前製作部員工表示,連累亞視的罪魁禍首根本就市場部(Marketing),然而每次「地震」,動盪最少的均是這部門,而且整個問責系統的邏輯亦很有問題:「如果我哋個節目出街畀人鬧,係我哋節目製作嘅問題,但係根本就係連理都冇人理,因為根本冇人知道亞視有咩節目!點解唔係marketing要負責任呢?仲要有傳聞佢哋(marketing)自己仲要加人工!」他解釋,市場部根本未能為公司作出適當宣傳,亦是公司收視不振的主因:「就算節目俾人鬧,起碼叫有迴響,大家收到回應都知道應該點糾正,但根本有好多人連亞視有節目都唔知!」他甚至笑言可以「下戰書」:「其實想知marketing做唔做到嘢好簡單,冇得呃,你拎100張10蚊紙出黎,喺地鐵站出面問人知唔知亞視重新開台後有咩新節目?如果答到就拎10蚊走,一個鐘之後,派剩就畀我,如果你派得哂我在掉轉畀返1000蚊你又點話?」

點擊瀏覽《香港01》更多內容和圖集

你可能感興趣:
邵子風自爆同蝦頭分手:我們在去年6月已經分手了
龍小菌經理人被打 警員教疑犯改口供 官:警員無罪但行為可疑