王貽興專欄：對香港人來說，今年情人節是獨一無二的。

今年情人節，對香港人來說，是獨一無二的。

過往情人節，餐廳一定爆棚，唔預早幾個月訂枱，唔洗旨意有燭光晚餐你食，但是今年情人節，只要你敢book，肯定有位，問題係，你敢唔敢出門食。

過往情人節，電視台一定會採訪花墟檔主，問問價錢，但今年情人節，識拍一定係拍藥房而唔係花檔，因為999枝玫瑰不再流行，但999個口罩，除了夠豪，還是夠豪，過往我們一直以為999枝玫瑰好貴，Sorry，在2020年的香港，一盒口罩，已經貴過晒。

999個口罩砌成的口罩花，既花心思，又能顯示誠意，更代表你另一半有返咁上下Power，畢竟口罩此刻比起愛或者鑽石更加無價，正宗有錢都買唔到，除非你是誠哥，或者偷偷收起政府CSI口罩轉賣的特權分子，否則，尋常百姓，就算你拼上爭贏幾百人衝上頭炷香的誠心與實力，排到頭位，都不一定能搶到一個半個口罩，更別說是貨真假實的口罩，而不是打開才知薄過紙的老翻假口罩……

過往情人節，辦公室女同事總喜歡鬥收大紥鮮花，冇人要冇人送，都要暗啞底自己訂一紥畀自己，恭喜所有冇拖拍既女仔，今年你地終於解放啦！唔需要再嘥錢買啲又大紥又難拎又唔等駛擺唔耐既鮮花啦，訂盒口罩，再搵人速遞畀自己，響所有同事面前簽收，再附上一張卡，上面寫著鄺仔式造作文青詩句，譬如話：「愛你，就要，好好保護，你。 / 不讓，惡菌病毒般的，狂蜂浪蝶，貼近，你的，肌膚。」

然後，再裝作不經意被同事搶來朗讀，Wooooo，仲唔威盡，一吐多年烏氣？

如果我係你，撲唔到口罩，將屋企剩返果盒豪埋出嚟，寄返畀自己，冒住派件過程畀人搶咗既風險，都絕對值得。

親愛的，今年情人節，不要花錢旅行了，因為困在機艙太危險，機場或者任何公眾地方都有中招的可能，最安全的，還是我們躲在家裡，Netflix and Chill，瘋狂纏綿，反正今日唔知聽日事……
然後妳會說，親愛的，對不起，連高官都話所有巿民最好自我隔離，唔好同任何人接觸，接吻都危險，何況上床？
親愛的，我下面要封關了。你都係乖乖地DIY，直到疫情完結，另行通知為止啦吓。

推薦閱讀:

➤ 2020情人節花店推介！心形主題花束、聯乘花盒等盡顯浪漫心思

➤ 2020新年及情人節好去處！8大香港打卡拍拖熱點推介

Follow us on:

• Facebook: elleOnlineHK

• Instagram: @ellehongkong

• YouTube: ELLETVHK