【真係搶】扣起人地批貨 內地市政府爭相搶口罩

 

個個呢期都搶口罩,「2盒thx」成為呢幾日最多人留嘅言。   搶口罩唔止出現喺民間,連內地各個市政府都出招,甚至不惜扣起人地批貨。   話說重慶以及其他城市,一批口罩被雲南大理市扣起。當呢幾個地方單位發信請求大理放行,大理嗰邊話已經將批貨分發俾前線醫護人員……咁梗係一秒激嬲全世界啦。

之後國務員下令,地方政府「不得截留調用醫療物資」,過幾日,雲南省政府都「割席」,批評大理嘅做法。

大理市只好道歉同答應還口罩。《環球時報》老總胡錫進都幫口大理市以及雲南省反應快速。

呢單嘅花生剛剛食晒,又有另一單。

青島市政府向青島海關提出,一批由韓國進口嘅10萬個N94口罩,以及由日本進口嘅N95,都似乎被瀋陽海關扣起。更絕嘅係,呢封信入面,青島市府希望海關以「對等原則」,處置一批瀋陽向韓國訂、包括口罩嘅防護物資,你做初一我做十五!   喺花生都未開得切之際,青島有關方面已經回應,話已經撤回呢份文件,亦有講法係文件根本無發出,只係有人流出咁話。

既然咁大個市政府都會拎人地啲口罩「應急」,係咪當堂明晒點解平民百姓上網訂完然後俾人「偷天換日」?原post傳送門