雅虎香港新聞 【有片】52歲阮兆祥開演唱會做歌手 17歲新秀入行綽號「學界陳百強」
根據維基百科：「阮兆祥（Yuen Siu Cheung，1967年5月23日－），曾是TVB合約藝人」沒錯！今年52歲，扮女人扮到入哂屋嘅阮兆剛於今年3月約滿TVB，唔再搞笑撈返本業—歌手！古人話：「五十而知天命」，即人到50歲多不得不認命，偏偏阮兆祥喺呢個年紀先更不服命，賺咗咁多年觀眾緣，今年就要追返自己嘅歌手夢，開演唱會！
新秀入行做歌手 但成名於TVB時期
好多人都會驚訝原來阮兆祥係歌手出身，對呀！阮兆祥其實參加過第三屆新秀歌唱大賽，當年係1984年，雖然最終落敗，但都叫歌手出身，最終就簽約TVB，當時主要都係主持音樂節目，例如《週末任你點》、《Sunday新地帶》及《勁歌金曲》。97年，佢離開TVB想再回復歌手身份出唱片，但不幸當時嘅唱片公司力圖唱片出現人事變動，令出碟計畫告吹，歌手夢又冇咗。
反而呢個時候，TVB監製梅小青找他回巢演出《樂壇插班生》，好似呢套劇就咁就奠定咗佢搞笑藝人嘅形象。
阮兆祥最深入民心嘅一定係與李思捷、王祖藍於台慶演出，成為扮嘢王，紅到開咗個節目《荃加福祿壽》俾佢地，更掀起全城扮嘢熱潮，阮兆祥亦憑其主持角色「荃加福」連莊成為2010年的最佳節目主持。
▲當然仲唔少得扮盧覓雪扮到「兩姊妹」！
明明喺TVB都紅到街知巷聞，偏偏去年TVB主動續約嘅時候，祥仔竟然拒絕，話想向外闖闖。
新秀落敗唔放棄 轉戰其他歌唱比賽再敗給李克勤
1984年參加第一屆新秀嘅時候，阮兆祥參賽歌曲係陳百強的《不》，把靚聲真係有幾份似Danny哥哥，難怪嗰陣被封「學界陳百強」，不過最終都三甲不入，當年嘅冠軍係張衛健。
不過年輕嘅祥仔對歌手夢相當堅持，輸咗一個比賽唔緊要，再轉戰另一個，第二屆全港十九區業餘歌唱比賽。
後來祥仔有獲香港電台合約，喺1989年出第一隻碟《序曲、另一半》，翌年再出《我心深處》。
▲《我心深處》唱片封面勁有型，行情深斯文路線，如果用返現今嘅術語，呢類應該叫「文青型」！
出完幾張唱片之後就入TVB，更同梅小惠一齊出左隻《是祥惠的》，封面惡搞梅姐另一張專輯《是這樣的》。其後就離巢打算做返歌手，點知就遇上力圖唱片出現問題，最後回巢TVB。
結果都係喺電視界成名，然後就一直專注拍劇，大家見到祥仔嘅《皆大歡喜》、《溏心風暴》都係佢嘅代表作，祥仔都好開心深得觀眾愛戴，但其實佢一直都冇忘記自己自出娘胎就鍾意嘅音樂。
▲2013年有出過兩首歌《世界仔》
▲仲有《二把》，有網民直頭留言「阮兆祥其實係一個唱歌材料黎~~可惜當年因樣子沒有其他歌手那麼討好.....就被人埋沒了」可想而知祥仔嘅歌聲真係有感動到人！
五十而不知天命 走歌手路圓人生夢
入行30多年以來，歌手呢個身份好似總係阮兆祥身邊擦身而過，出過幾張唱片，正打算要主攻歌手路嘅時候，就總會「撻Q」。今年52歲嘅祥仔屈指一算，由佢1989年出第一張唱片開始，距今已30年，祥仔：「應該係時候回歸做歌手，好好做返個歌手！」佢仲話：「以往做嘅例如《福祿壽》都係氹大家開心，比較誇張。而家我就想純用音樂去感動人，好認真對待自己歌手身份，因為呢個都係我夢想嚟。」
2019年，祥仔選擇跳出安舒區，以歌手身份重新出發，舉辦人生第四個個人show，以歌聲唱出30年追夢旅程。祥仔：「不論專輯還是演唱會，都希望將一個2.0版嘅阮兆祥送給大家，唔奢望成功，只希望大家睇到我嘅誠意，亦都希望大家接受我係一個實力派嘅歌手。」不求所有事都係第一，只求盡力同認真去做，就係祥仔嘅格言。
▲幸運係唔會降臨喺心地差嘅人身上，而搞笑以外嘅祥仔，其實經常會周圍去做義工，仲會帶埋媽媽去。
所以話，佢今日工作上嘅順利、圈中好友、觀眾緣，都係佢日積月累嘅福氣。祥仔嘅朋友粒粒都係天王巨星，當中不乏已逝去的梅姐梅豔芳。
▲祥仔曾經同已過世的羅記羅文都份屬好友。
祥仔喺娛樂圈做咗30幾年，賺到了人緣、觀眾緣，TVB好錫佢亦都想繼續留佢，但佢就選擇唔續約，計計下，佢都已經係第三次離開TVB：「唔續約就係唔想人混淆，唔想再比人覺得我做歌手係搞笑、係沙沙滾，今次真係好認真，希望俾人覺得祥仔係有誠意，同埋係個喺音樂上有理想嘅歌手。」
冇錯！阮兆祥係真係好認真㗎，今次佢嘅演唱會和Hi-Fi唱片，除咗主題曲《大夢想家》，仲會有大家耳熟能詳嘅翻唱歌曲，希望舊歌都會令人有新鮮感。
阮兆祥King of Dreams演唱會
日期: 25-27/10/2019
時間: 20:15
地點: 旺角麥花臣場館
推薦閱讀:
➤ 【有片】藝人英文大比拼！陳偉霆、何韻詩、陳法拉大show英文 你最鍾意邊個？
➤ 【白色強人】完全唔似40歲！靚仔醫生黃嘉樂係Sweet爆男友？ 入行18年只欠好角色發圍
Follow us on:
Facebook: CosmoHK
Instagram: @cosmopolitan_hk
YouTube: CosmopolitanHK
