2020年上半年回顧 上位藝人逐個數 蘇皓兒/何依婷/陳欣妍，仲有佢...

今年唔經唔覺就過咗一半，當中有唔少藝人發展順利而人氣急升，深受觀眾及網民喜愛。今日就同大家睇下邊幾位藝人喺上半年成功上位，唔知大家又同唔同意呢？

吳海昕

喺出道前，吳海昕（Sofiee）邊讀大學邊做空姐，其後因電影《狂舞派》，啟發咗佢嘅人生，令到佢跳出框框，決定加入娛樂圈！有「民選港姐」之稱嘅Sofiee，喺2014年參選港姐時被視為大熱，可惜最終三甲不入，僅獲得旅遊大使獎。之後，佢就去咗紐約修讀電影系，畢業後返港擔任過唔同節目主持及參演唔少電視劇，例如港台《獅子山下2016》、《火速救兵IV》及ViuTV《賤民20》等等。今年憑ViuTV愛情穿越劇《二月廿九》中飾演女主角張麗紗（Yeesa）人氣急升，唔少網民睇完佢演出都激讚佢演技有層次，令人眼前一亮。

張松枝

現年53歲嘅張松枝，喺無綫時期經常喺劇集飾演二世祖或奸角，所以有「御用二世祖」嘅稱號。不受重用嘅張松枝，喺2012年選擇離巢向外闖，除咗為港視、港台及ViuTV拍劇集之外，佢都有拍電影、網劇及去內地拍劇。今年張松枝就喺《二月廿九》飾演Yeesa（吳海昕飾）爸爸辰叔，喺劇中頭髮斑白佬味十足，憑精湛演技備受網民關注。

沈殷怡

ViuTV節目《辣伙頭》大受歡迎，更成為大家茶餘飯後嘅熱門話題，當中最受矚目嘅一定係沈殷怡（Shirley）及陳欣妍，佢哋仲被網民封為索女組合「 Double S 」。沈殷怡自上年拍攝《詭探前傳》做秋官個女彭靜後，人氣急升。今年更憑行山節目《美女郊遊遊》中嘅比堅尼行山，吸引大家注意而迅速上位，成為新一代女神。沈殷怡除咗樣靚身材正之外，讀書仲好叻添呀！佢獲得全額獎學金，升讀上海復旦大學法律系，考獲內地律師牌後，再喺中大修讀碩士課程。

陳欣妍

2016年加入娛樂圈嘅陳欣妍（Shirley），樣子甜美有氣質，加上身材標緻，成功得到網民關注。加上陳欣妍今年與沈殷怡喺《辣伙頭》表現突出，深受網民熱愛，被封為「Double S」。之後，ViuTV仲幫佢哋開設新節目《美女郊遊遊》，節目除咗介紹行山地點之外，最吸睛嘅一定係兩位靚女着住比堅尼行山，被網民瘋狂討論，人氣直線上升。而感情方面，陳欣妍就同沈震軒拍拖3年多，愛得甜蜜。

何依婷

2017年港姐亞軍何依婷（Regina），憑甜美笑容成為無綫新一代女神。除咗擔任主持工作之外，何依婷仲開始接拍劇集。今年憑《機場特警》中飾演楊明嘅空姐兼網紅女友李至安（安安）人氣急升，亦係何依婷第一次拍劇，劇中有大膽演出，好似要著比堅尼洗車。唔少網民睇完佢嘅演出都大讚佢演技自然，眼神交足戲完全唔似第一次拍劇，再加埋佢有樣有身材，成為無綫新一代宅男女神。

蘇皓兒

蘇皓兒（Chole）係前女子組合As One成員之一，喺拍攝檸檬茶廣告後獲得網民關注，蘇皓兒因樣貌似周慧敏，所以有「翻版周慧敏」之稱。蘇皓兒有份演出嘅劇集《那些我愛過的人》正在熱播中，佢喺劇中飾演林文龍個女姜子優，雖然Chloe已經26歲，不過演中學生仍然青春逼人，一啲違和感都冇。Chole喺劇中有不俗嘅表現，成功憑角色入屋，獲得網民關注。