《C9特工》今首播 高海寧捱足12年終成當家花旦
無綫原本安排重頭劇《唐人街》緊接《反黑路人甲》檔期播出,不過早前突然變陣改播由高海寧、馬國明及黎諾懿等人主演嘅《C9特工》。呢套劇睇個劇名就知道係以特工為題材,劇情主要講述特工C9余小嬌(高海寧飾)所隸屬嘅特工組織分部無故爆炸,佢自此就同總部失聯。小嬌就邂逅咗賣菜佬高大勁(馬國明飾),之後仲嫁埋俾佢過平凡而幸福嘅師奶生活。幾年後昔日拍檔B3馬雷斯(黎諾懿飾)突然出現,要求佢一齊搵出分部爆炸嘅原因,自此佢過著師奶及特工嘅雙重身份生活。不過後來小嬌身份暴露兼發現驚人真相,最終余小嬌同高大勁夫妻同心,與恐怖勢力決一死戰。
如果要講今期最紅嘅無綫花旦,一定非捱足12年嘅高海寧(高Ling)莫屬。現年33歲嘅高海寧,2008年參加香港小姐,賽前被視為大熱,可惜五強止步只能獲「旅游大使獎」。入行初期,高Ling嘅34D驕人身材經常成為焦點,更加被封為「TVB新一代咪神」。雖然高Ling演出機會不斷,但大家只著眼喺佢身材上而無視佢喺工作上嘅努力,更被冠上「花瓶」稱號,令佢曾一度壓力爆煲而患上抑鬱症,暴飲暴食劇增30磅。
之後,高Ling開始收起性感,默默拍劇做好每一個角色,先後透過《天梯》姜艷萍、《法網狙擊》紀慕芝、《使徒行者》林希微及《不懂撒嬌的女人》田蜜等角色,慢慢一步一步咁俾大家留意佢嘅演技。直至上年《婚姻合伙人》飾演貝競枝Kimchi,先首次擔正做女一,同年佢喺《金宵大廈》飾演人母周小惠,演技終被受肯定。今年高Ling仲劇接劇咁輪住播,繼《殺手》、《迷網》、《反黑路人甲》及客串內地劇《三十而己》後,《C9特工》已經係佢連續第5套出街嘅劇集,連高Ling自己都話好似破咗公司紀錄。另外,早前無綫開拍新劇《七公主》,劇集搵嚟多位備受力捧嘅女藝員主演,當中包括高Ling,佢喺劇中飾演麻甩女貨車司機顧青桐,不惜剪短頭髮及紮胸上陣,同佢以往嘅形象好唔同。近年高Ling演技備受讚賞,愈戰愈勇成功搣甩花瓶形象。