《降魔的2.0》客串陣容強勁 江嘉敏即將登場飾演高難度角色

由馬國明、黃智雯、胡鴻鈞、劉佩玥及譚凱琪等人主演嘅無綫靈異劇《降魔的2.0》，唔經唔覺已經播咗3星期，劇集口碑尚算不俗。除咗題材吸引及靚女演員雲集之外，劇集仲搵嚟唔少演員客串，令觀眾驚喜萬分，例如已經出咗街嘅有朱千雪、林淑敏、何雁詩、歐瑞偉、李偉健、安德尊及羅蘭等等，最新將會登場嘅有「清純女神」江嘉敏。

江嘉敏今次喺《降魔的2.0》客串飾演嘅17歲嘅盲眼少女嘉嘉，係豪仔（胡鴻鈞飾）嘅初戀情人，第13集佢已經出現過，不過只係出現喺豪仔嘅回憶入面，所以喺聽晚第15集先至正式登場。劇情將會講述豪仔知道自己唔能夠擺脫「海魔」操控，所以喺失落時就諗起多年前認識少女嘉嘉（江嘉敏飾），不過現時嘉嘉已經係一位失明人士，佢雖然睇唔到，但係可以用心去感受到豪仔嘅存在。

江嘉敏對第一次扮演失明人士，覺得幾有挑戰性，加上劇集講述佢同胡鴻鈞有好多回憶片段及初戀感覺，同時飾演失明人士嘅神情都要跟足，所以江嘉敏話係一個高難度角色。