《飛虎之雷霆極戰》香港首播 網民：陣容強勁有電影感但劇情太誇張

劇集《飛虎之雷霆極戰》喺星期一首播，劇集其實上年喺內地播完，不過對於一班未睇嘅觀眾都影響不大。今次劇情有講對抗國際勢力、又有唔少槍戰特技場面，網民都有讚有彈。我哋而家就同大家一齊睇下網民有咩睇法啦！

有電影感但劇情誇張冇張力

為咗營造電影感，今次劇集加咗好多槍戰場面，仲有大炮軍火、導彈潛艇、更有高科技武器，之後又出動貨櫃車鬥車同直升機，比起無綫其他劇集都算係落重本有大突破啦！不過網民就唔多接受，覺得劇情太誇張, 太多犯駁位，好好笑，「睇完第一集, 內容好誇張, 咁勁既軍火, 王生兩野就自己拆左」、「用直升機引子彈 呢個戰術真係走上世界NO. 1 」、「玩到咁大，不如話核彈仲有睇頭啦」、「直升機橋底飛過，現實好似無直升機咁做，唔炒機算感恩。」及「入面D 角色好似個個都十八般武藝咁款... 劇情太誇張, 第一集我覺得唔好睇, 再睇多幾集先, 希望唔洗棄劇」等等。

卡士陣容強勁又多型男（黃宗澤、吳卓羲、馬國明、苗僑偉）

《飛虎之雷霆極戰》卡士陣容強勁，除咗有苗僑偉、黃宗澤、吳卓羲、馬國明同王敏德等等，淨係睇一班型男都夠。同時亦搵嚟一班久未露面嘅演員，包括有吳啟華、蒙嘉慧及苟芸慧等等。網民覺得「依套劇主要睇啲人」、「套劇d角色好有誠意」。

對白重新配音好奇怪

劇中飾演女特首嘅汪明荃同飾演保安局局長嘅潘志文好有新意，不過唔知點解特首同保安局局長啲對白要重新配音，配到成句口型都唔同晒，網民都覺得好奇怪。

劇集主題曲唔係星夢歌手唱

劇集主題曲亦都好有新意，搵嚟兩度奪得「金曲歌后」嘅莫文蔚主唱，對於終於唔係星夢歌手唱主題曲，一眾網民都表示開心，「莫文蔚首新歌好好聽」、「全套劇暫時最正係莫文蔚首主題曲」、「莫文蔚幾好聽」等等。

馬國明霸佔兩線黃金檔期劇集

黃金檔期兩套劇都係馬國明，喺《降魔的2.0》做完的士佬就馬上去《飛虎之雷霆極戰》做警察，睇到啲觀眾好亂，不過唔少網民都認為馬明都係適合揸的士。另外，喺《降魔的2.0》有份主演嘅譚凱琪同劉佩玥都會喺《飛虎之雷霆極戰》演出，而《十八年後的終極告白》就啱啱大結局，不過陳山聰及林嘉華亦會喺《飛虎之雷霆極戰》出演。

又係警匪片

啱啱做完《法證先鋒IV》及《機場特警》無耐，而家又做《飛虎之雷霆極戰》，而啱啱播完嘅《十八年後的終極告白》又係講查案，全部都係警匪片，有網民就問「點解搞到香港好似好多罪犯咁」，同埋「係唔係冇其他題材可以拍」。