《金宵大廈》好評如潮 呢班配角功勞唔少

無綫熱播劇《金宵大廈》以奇幻懸疑作題材，雖然演員陣容未算強勁，不過劇情吸引，成功吸引唔少觀眾收睇。除咗男女主角陳山聰同李施嬅演出有驚喜之外，其實一班配角嘅功勞都唔少㗎！

有無綫「御用癲婆」之稱嘅趙希洛，佢話《金宵大廈》飾演憶子成狂嘅何太係佢影藝生涯最恐怖嘅一個角色！佢喺劇中飾演嘅何太，除咗以保母身份慢慢融入徐太（葉凱茵飾）之外，佢仲幫徐太BB改名「豆豉仔」同餵母乳等等，目的就係想將人哋嘅BB據為己有。唔少網民都大讚佢演得出色同好恐怖，仲話今年嘅「飛躍女藝員」應該係屬於佢。希望嚟緊可以睇吓佢唔係咁「癲」嘅演出啦！

葉凱茵喺劇中飾演被何太（趙希洛飾）搶走BB嘅徐太，最後仲被誤會有精神病，要入精神病院。呢個角色一直備受迫害，但現實生活中佢其實已經有一個幸福家庭。過往因為時常飾演秘書而被稱為「秘書王」，經過今次演出之後，佢應該得到更加多機會啦！

有時配角亦會暗藏高手！吳嘉儀呢個名大家未必咁熟悉，佢喺《今宵大廈》嘅單元《烏鴉》中入面飾演「鴉烏婆」，演繹嘅難道就係佢對白唔多，全靠表情眼神來做戲！吳嘉儀雖然30歲未到，但係除咗電視劇之外，港台電視劇以及舞台劇都有佢嘅足跡。而佢亦喺演藝學院畢業，實力不容忽視，絕對期待佢之後嘅演出！

黃子雄過往飾演嘅有錢人真係入型入格，尤其係《愛·回家》入面嘅查生。不過佢今次唔再係飾演有錢人或者二世祖，而係飾演小食店老闆佳爺兼單身爸爸，更迷戀著吹氣娃娃Mary，完全突破以往戲路，令觀眾覺得幾有新鮮感！

馬貫東喺《金宵大廈》單元《洞》中飾演新住客李家俊，除咗經常偷窺住喺隔壁嘅KOL Mia（歐陽巧瑩飾）之外，佢仲係一個宅男嘅鍵盤戰士，同佢有少少「毒」嘅外型又幾配合！不過佢離開《愛．回家》之後確實TVB俾佢嘅機會多咗好多，他朝會唔會變成另一個「天然呆」嘅馬明？

單元《異夢》入面一對同性戀妓女，分別由尹詩沛飾演嘅芳芳，同阮兒飾演嘅莎莎有冇印象呢？尹詩沛過往喺《天梯》、《拳王》、《讀心神探》都係飾演妓女或陪酒之類嘅角色為多，正好呢一次佢可以發揮所長，而佢亦都不負眾望！

另一位就係阮兒，佢就係《愛·回家》入面飾演高秀蘋Pinky為人認知！今次喺《異夢》發揮空間大咗！佢哋兩個嘅同性戀愛情故事亦觸動唔少觀眾！