【重返無綫劇接劇】《愛·回家》「朱展」陳嘉輝為演藝夢放棄做工程師

無綫處境喜劇《愛·回家之開心速遞》深受觀眾喜愛，口碑及收視都好過唔少重頭劇。劇集嘅成功除咗編劇嘅創意及主要演員落力演出之外，一班配角都居功不少。唔少配角更憑劇集成功彈起，好似飾演朱凌凌爸爸「朱展」嘅陳嘉輝。

陳嘉輝喺劇中除咗係一位律師之外，佢亦係朱凌凌（吳偉豪飾）及朱天梯（梁証嘉飾）嘅爸爸「朱展」，佢一心想囝囝朱凌凌成為律師，佢試過裝病逼凌凌轉系及收埋凌凌嘅好朋友，不過都係失敗收場。除此之外，由於金城安破壞力驚人，佢同譚道德 (陳榮峻飾) 及「送水輝」宋瑞輝（許家傑飾）組成「SO苦主大聯盟」，經常喺送水輝嘅酒吧傾偈飲嘢。角色形象健康又搞笑，令陳嘉輝成功入屋。

現年56歲嘅陳嘉輝喺入行之前，佢畢業於理工大學土木工程系，曾經係政府土木工程拓展署嘅工程師，因為當時佢廣告被無綫睇中，再加上佢對演戲有興趣，所以佢就放棄做工程師，加入娛樂圈實現自己嘅演員夢。喺加入無綫後，佢即刻被公司力捧，先喺《430穿梭機》做主持，之後1998年首套處境劇《都市方程式》就同郭富城齊齊擔任男主角，之後亦喺唔少劇集擔演重要角色，例如《我係黃飛鴻》、《螳螂小子》、《飛星尋龍》及《超能幹探SuperCop》等等。當時陳嘉輝更與張衛健、林文龍和劉錫明被稱為「太陽之子」，係無綫力捧小生之一，前途無可限量。

不過佢喺1997年離開無綫，之後仲去過馬來西亞、內地及台灣發展，直至2007年回流，並喺2014年重返無綫拍劇。重返無綫後，佢除咗喺《開心速遞》飾演朱展一角，佢亦拍過唔少劇集，例如《四個女仔三個BAR》、《張保仔》、《公公出宮》、《迷》、《平安谷之詭谷傳說》、《是咁的，法官閣下》及熱播中嘅《包青天再起風雲》（即將出場）等等。另外，佢仲有5套劇集仲未出街添呀！雖然陳嘉輝現時都係做配角為主，不過佢就認為只要有得做戲同埋角色有得發揮嘅話，佢已經好滿足。

陳嘉輝加入娛樂圈，除咗一圓演藝夢，仲為佢搵到一個好老婆。佢同老婆梁小冰喺1992年因拍攝劇集《兄兄我我》而認識並相戀，拍拖8年後結婚，2007年梁小冰誕下囝囝陳洋溢（Lewis），一家三口幸福美滿。當時因為想多啲時間留喺香港，佢先決定回巢無綫拍劇。