邊個話台慶劇一定高收視? 細數近年無綫低收視台慶劇

無綫今年嘅台慶劇經過多次變動,喺日前終於塵埃落定,3套台慶劇包括《牛下女高音》、《多功能老婆》及《解決師》。無綫每年都會推出大製作或大卡士嘅劇集做台慶劇,不過邊個話台慶劇就一定好睇,同埋一定會高收視呢?其實過往有唔少收視同口碑都麻麻嘅台慶劇,而以下呢幾套就係近年低收視嘅台慶劇啦!

《是咁的,法官閣下》劇照
《是咁的,法官閣下》劇照

上年台慶劇《是咁的,法官閣下》,由黃智賢、關禮傑、王君馨及麥明詩等人主演。劇情雖然寫實,講述佔領中環及肢解雙親案等真實案例,令到唔少香港人回憶返晒嚟。另外,劇集仲搵嚟王君馨首次擔正,及多位新人飾演新晉律師,成功為觀眾帶嚟新鮮感。不過就有幾點令到收視一直冇起色,例如過份硬銷王梓軒、背景音樂令人煩悶、王君馨講對白好似讀稿及劇情太多說教位等等,最終令劇集平均收視只有23.7點。

《幕後玩家》劇照
《幕後玩家》劇照

2016年台慶劇《幕後玩家》,搵嚟黃宗澤、張繼聰、蕭正楠及黃翠如主演,劇集喺播出宣傳片時已經引起網民同公關業界人士不滿及迴響,紛紛指責批評劇集離地兼塑造嘅PR形象不實。喺劇集出街後,網民嘅評價都係冇改善,劇集嘅趕客原素包括頂唔順連續睇兩套蕭正楠、黃宗澤同張繼聰似鴨王多過PR、劇情離地未能反映現實及黃翠如演技被勁彈等等,令到劇集平均收視得23.6點。

《致命復活》劇照
《致命復活》劇照

2016年台慶劇《致命復活》,由郭晉安、萬綺雯及王浩信等人主演。劇集一出街就已經令好多網民覺得好奇,因為好多情節都好令人百思不得奇解。好似郭晉安流落荒島,被一條鐵鏈足足困10年,佢磨10年先斷開,反而黃德斌被鎖,但朱晨麗及萬綺雯用一塊石仔就已經可以將條鏈打得爛。亦有一幕係講到王浩信去荒島,想阻止郭晉安殺黃德斌,浩信竟然拎手機想報警求助,事問點解仲可以收到訊號可以用電話溝通。雖然有「視帝」郭晉安助陣,不過劇集嘅平均收視就只有23點。

《老表,畢業喇!》劇照
《老表,畢業喇!》劇照

《老表2》嘅收視已經後繼無力,不過無綫依然好有自信咁開拍第三集。2017年台慶劇《老表,畢業喇!》,由郭晉安、蔡少芬及王祖藍等人主演,劇情主要係講述香港教育制度,有好多香港實體推行嘅新晉教育。雖然《老表3》班底本身唔錯,依舊有王祖藍加郭晉安,仲加入蔡少芬、蔡瀚億及林欣彤等等,不過都無力挽救收視。唔少網民都認為喜劇又唔夠喜劇好笑,嚴肅劇又唔夠嚴肅劇,都唔知想帶出咩訊息。再加上劇集冇咗萬綺雯、王菀之、黃光亮及朱咪咪等呢幾位有份量藝人,真係覺得劇集質素下降,所以《老表》系列收視神話不再,平均收視得22.5點。

《飛虎II》劇照
《飛虎II》劇照

《飛虎I》劇情節奏明快,由訓練到出任務都令人覺得緊張刺激。2014年台慶劇《飛虎II》就突然多咗條愛情線,係講馬德鐘及鍾嘉欣。當佢哋一出現,網民已經話佢哋係「大纜都扯不埋」,仲話馬浚偉襯好多。而嘉欣由上集係臥底,今集突然回復警察身份,唔知係咪嘉欣未能夠充分發揮佢嘅演技,所以角色不太討好。一直唔多被網民認同及肯定嘅梁烈唯配襯苟芸慧,直頭係「高攀唔起」。如果講一個結局搞死一部劇嘅話,《飛虎II》絕對係表表者,好似其中一幕就係醫院突然有番梘泡飄出嚟,仲要俾梁競徽見到賊嘅倒影,之後仲可以用手槍射殺佢哋。劇集除咗平均收視得21.1點之外,更被封為世紀級膠劇。

《來自喵喵星的妳》劇照
《來自喵喵星的妳》劇照

2016年台慶劇《來自喵喵星的妳》係以《鬼同你OT》原班人馬拍攝,搵嚟陳豪、田蕊妮及胡定欣主演,本應收視應該唔會差得去邊,點知劇集收視不似如期,平均收視20.9點,最低收視仲驚見16.1點。唔少網民都認為田蕊妮扮貓好難頂及劇情唔知講乜。