【越嚟越多】無綫舊將倒戈亮相ViuTV發展成點？

近年無綫越來越多演員及當家小生花旦選擇離巢向外闖，當中唔少演員轉投到ViuTV，雖然唔少都係部頭劇形式合作，不過仍然得到觀眾及網民嘅期待及熱烈討論。而家就同大家數下近期有邊啲前無綫藝人現身ViuTV啦！

陶大宇

有「師奶殺手」之稱嘅陶大宇，唔經唔覺離開無綫已經十年，離巢後到內地發展。繼上年播出嘅《詭探前傳》飾演「江湖大佬」鬼成之後，陶大宇連同郭政鴻及楊尚友合作主持煮食綜藝節目《辣伙頭》。

郭政鴻

龍虎武師出身嘅郭政鴻，多年嚟星運平平，直至15年離開效力28年嘅無綫。近月佢就夥拍陶大宇楊尚友主持煮食綜藝節目《辣伙頭》。雖然唔少網民話節目似《美女廚房》加《MasterChef》，不過仍然引起熱話。

金剛

台灣藝人金剛喺09年加入無綫，多年嚟最為人記得嘅應該係《街坊廚神》及《超級無敵掌門人》，當中佢唔鹹唔淡嘅廣東話深得觀眾歡心。不過佢喺2017年離開無綫返家鄉台灣，最近仲過檔ViuTV，繼早前與麥長青主持《C9旅行團》玩盡台北同宜蘭後，佢近排仲孭重飛，與4位靚女主持去東京拍攝旅遊節目《金剛旅神團》，節目中佢哋擦出不少火花，上星期播出5集已經創收視新高。

麥長青

喺無綫工作超過30年嘅麥長青（麥包），多年嚟拍過唔少劇集，當中不乏經典角色，例如《西遊記》沙僧及《巾幗梟雄之義海豪情》非凡哥，佢憑住角色梁非凡勇奪「最佳男配角」，風頭一時無兩。最終選擇離開嘅佢，早前就去咗ViuTV拍攝處境劇《娛樂風雲》，同埋與金剛合作嘅旅遊節目《C9旅行團》。

伍詠薇

亞姐出身嘅伍詠薇，喺1994年過檔無綫，多年嚟經常擔演重要角色，好似有《天地男兒》Rebecca、《窈窕淑女》Bonnie及《銀樓金粉》程秀杏等等。2013年離巢恢復自由身後，伍詠薇嘗試唔同嘅發展，喺今年佢仲宣布加盟ViuTV，仲擔任全港首個以電視直播形式嘅全新遊戲節目《埋嚟睇·埋嚟玩》。除此之外，佢仲有參與劇集《嘆息橋》拍攝。

鄧萃雯

相信冇人會質疑「視后」鄧萃雯（雯女）嘅演技，喺無綫效力期間有多個經典角色，當中包括《薛仁貴征東》柳金花、《倚天屠龍記》周芷若、《金枝慾孽》鈕祜祿如玥、《巾幗梟雄》四奶奶及《巾幗梟雄之義海豪情》九姑娘等等，全部都深入民心。離巢後佢北上發展，不過都係做女配角居多。前年ViuTV成功邀請到雯女拍攝劇集《婚內情》，劇中與陳錦鴻飾演夫妻，劇集喺上年出街，反應相當不俗。

廖碧兒

2001年參與國際華裔小姐奪冠後，正式加入無綫。2011年離巢後，佢有一段時間冇參演劇集，原來已經考取國際品酒認證資格，更豪擲千萬於法國購買酒莊釀酒。除咗開始做生意之外，佢更繼續參與拍攝節目，而且更係與ViuTV合作，參與劇集有《瑪嘉烈與大衛系列－綠豆》《瑪嘉烈與大衛系列－前度》、《做演藝嘅》、《身後事務所》、《婚內情》及《娛樂風雲》。

林保怡

喺無綫效力多年嘅林保怡，有唔少令人印象深刻嘅角色，例如《妙手仁心》Henry、《天與地》Joe、《珠光寶氣》Calvin及《金枝慾孽》孫白颺等等。離開無綫後，佢喺2016年幫ViuTV拍攝劇集《瑪嘉烈與大衛系列－綠豆》，播出後成為網上熱門討論話題。喺待播劇《嘆息橋》，林保怡除咗主演之外，佢仲會兼任埋監製。

除咗以上咁多位之外，亮相ViuTV嘅前無綫藝人仲有周家怡、黃淑儀、譚小環、李綺虹、向海嵐、楊思琦、張松枝、阮兆祥、林曉峰、徐肇平、陳錦鴻、廖啟智、林泳淘及唐寧等等。