與譚嘉儀合唱插曲中文版 馬明被網民劣評: 有點打冷震嘅感覺

無綫醫療劇集《白色強人》喺上星期五播出大結局，相信大家都留意到每逢重要場口，劇集都會播出一首旋律優美嘅英文歌，而呢首歌就係由譚嘉儀主唱嘅英文插曲《Can You Hear》。雖然有唔少網民聽到前奏已經覺得煩擾，不過歌曲仍然大獲好評，MV喺網上影片平台有超過200萬點擊。而無綫就食住個勢推出中文版《願留住你》，由飾演唐明醫生嘅馬國明與譚嘉儀合唱，仲拍埋MV。喺MV中二人喺床上又攬又錫咀，十分纏綿。可惜MV推出後網民對馬國明嘅歌喉彈多過讚，認為將首歌完全摧毀，紛紛留言話：「真心講，馬明都係做戲好啲！」、「有點打冷震嘅感覺」、「感覺好唔舒服，這MV應該揾唐詩詠拍」、「好彩有調音師😂」、「馬明拍返戲吧」及「馬明唱歌唔係好得😅」等等。

另外，譚嘉儀前幾日亦同羅天宇翻唱阿拉丁嘅《A Whole New World》，佢哋合唱意外地獲得唔少好評，唔少觀眾話估唔到唱歌咁好聽，讚佢歌喉相當有水準，紛紛留言話：「估唔到喎 原來羅天宇唱歌咁好聽」、「羅天宇唱仲好聽過陳偉霆」、「我不是專業的評審，但是我是用心聽的粉絲😊😊這真的是我聽過最好聽的版本，不說原唱」、「羅天宇好驚喜」及「天宇有驚喜喎 兩位都唱得好好~」等等。