【準男主人？】與湯洛雯愛得高調 馬國明自由出入女友住所

馬國明喺6月被踢爆與「靚湯」湯洛雯相戀，二人隨即上載定情公仔照片到社交網站大方認愛，非常合襯嘅佢哋獲得全城祝福及想佢哋快啲拉埋天窗。馬國明嘅拍拖方式更同以前完全唔同，變得愛得高調，經常喺社交網站打情罵俏。近日有傳媒影到馬國明去湯洛雯紅磡住所，馬明仲喺銀包攞出住戶證，成個男主人咁。隔日靚湯亦去咗馬明屋企，陪住馬明同伯母hea足一日。

劇接劇嘅馬明近排忙於拍攝《兒科醫生》，連休息都唔夠時間，靚湯都好識做，去馬明太古城屋企陪住佢，而馬明有時間陪女朋友之餘兼有時間陪媽咪。一向顧家嘅馬明被影到陪媽咪買外賣同日用品，期間仲全程拖住媽咪。而靚湯間唔中都會去探伯母，仲唔介意多咗伯母呢個「電燈膽」，估計伯母亦對呢位「乖乖女」女友相當滿意 。馬明同前女友黃心穎拍拖時，有傳出伯母唔係咁滿意黃心穎，原因係佢太過追求物質。相反靚湯就簡單好多，鍾意喺屋企玩煮飯仔同煲下劇。另外，靚湯仲鍾意買磚頭，上年用四千幾萬購入馬鞍山豪宅，而家已經升咗10%，真係投資有道。