雅虎香港新聞 海魔/風獅爺/林朗生/姜子優 細數上半年令人印象深刻無綫劇集角色
今年眨吓眼就已經過咗半年，當中唔少演員將劇集角色發揮得淋漓盡致，令觀眾留下深刻印象，成功入屋。今日就同大家重溫一下，唔知大家又同唔同意呢？
《降魔的2.0》海魔Thalassa（譚凱琪飾）
譚凱琪（Zoie）樣子可愛甜美，今次喺劇中一人分飾多角，以經常飲醉酒嘅的士乘客阿花、古代降魔人妻子允瑩及大反派海魔Thalassa演出，又時裝又古裝造型，被網民封為「最美分派」。除咗造型吸引網民之外，戲份唔輕嘅佢成功將幾個角色嘅性格同行為完美演繹，演技備受肯定，證明佢係有外型有演技。
《降魔的2.0》風獅爺（C君飾）
C君喺劇中飾演石精靈風獅爺，平時為人好色，好鍾意偷窺女仔裙底，最後因為芷若（黃智雯飾）而協助小馬（馬國明飾）解決降魔疑難。不過最爆嘅都係C君一出場就要裸露示人。今次C君喺劇中表現生動盞鬼，佢嘅口頭禪更深受小朋友喜愛，紛紛模仿佢講「你爺爺我...」。《
《十八年後的終極告白》林朗生（譚俊彥飾）
譚俊彥喺劇中身為男一飾演會計師林朗生Sam，因為18年前與一班朋友埋屍後，佢就努力發奮，仲成為一個忠忠直直嘅會計師。不過骸骨最終被意外發現，佢就做出一錯再錯事情，「黑化」後嘅Sam，為掩飾秘密，不惜大話冚大話，最後仲錯手將好朋友阿一殺死。譚俊彥將劇中角色發揮得淋漓盡致，網民仲話佢做得好好及眼神表情交到戲，今次佢可以話為自己「收視毒藥」呢個稱號作出平反。
《十八年後的終極告白》謝家倩（楊秀惠飾）
楊秀惠喺劇中飾演聾啞人士謝家倩，佢喺拍攝過程要記大量手語，同時眼神同表情又要配合手語，所以可以話係相當之有難度。喺劇中佢排除萬難終於同阿一成為情侶，不過可惜無法終老。有唔少慘情喊戲嘅楊秀惠，今次獲觀眾大讚，成功搣甩「花瓶」形象。
《十八年後的終極告白》趙玉娣（尹詩沛飾）
尹詩沛喺劇中飾演「豬肉婆」Tiger嫂趙玉娣，佢表面好惡好霸道，仲成日鬧老公Tiger（杜大偉飾），大家原本都覺得呢個老婆好難頂，但實際佢其實係好愛Tiger。佢每一次出場都令觀眾留下深刻印象，尤其係喺豬肉檔嗰場爆喊戲，真係睇到大家心都噏埋。
《那些我愛過的人》姜子優（蘇皓兒飾）
「新一代氣質女神」蘇皓兒（Chloe），前女子組合As One成員之一，喺劇中飾演姜煜誠（林文龍飾）女兒姜子優，兩父女相依為命，感情方面就會周旋喺朱嘉炳（顧定軒飾）及Eden（李任燊飾）之間。雖然Chloe已經26歲，不過演中學生仍然青春逼人，成功憑角色入屋，獲得網民關注。
《機場特警》李至安（何依婷飾）
何依婷憑甜美笑容成為無綫新一代女神，今次《機場特警》係佢第一次拍劇，佢喺劇中飾演空姐兼網紅李至安（安安），同時亦係馬容義Easy（楊明飾）嘅女朋友。何依婷除咗演技亮眼之外，佢仲有大膽演出，例如要對手楊明摸大髀及要著比堅尼洗車。唔少網民睇完之後都大讚何依婷表現自然，係可造之才。
《法證先鋒IV》鄒浩（楊潮凱飾）
楊潮凱喺劇中「水泥童骨案」單元飾演智商只有6歲嘅低智人士鄒浩，講佢同媽媽蘭姨（黎燕珊飾）失散23年後重逢，不過意外捲入一宗藏屍案。唔少人睇完佢嘅演出後都大讚佢將角色發揮得淋漓盡致，俾佢同黎燕珊嘅母子情所感動。楊潮凱無論外型及演技都要花上好多心思去練習，大家都睇到佢逐漸成熟，今次喺劇中的確有大突破！
《黃金有罪》莫莉莉（劉芷希飾）
劉芷希喺劇中飾演夜總會紅牌舞女莫莉莉，暗戀錢永進（蕭正楠飾），佢有唔少場口都需要性感衣着登場，當中包括喺沙灘以紅色比堅尼泳裝上陣，憑着火辣辣的身材，成功吸引網民關注，人氣急升。
《大醬園》葉細么（龔嘉欣飾）
龔嘉欣喺劇中飾演大奸角葉細么，由最初同夏小滿（朱晨麗飾）係好姊妹，及後齊齊做醬園學徒，到後期盲目追求名利。心機算盡嘅佢不惜一切成為專員（袁文傑飾）太太，往後更心狠手辣殺人，其中有一幕報仇殺曾經強姦自己嘅劉星威（阮政峰飾），神情眼神簡直令人毛骨悚然。呢套劇集可以話係龔嘉欣嘅代表作之一。
