武漢肺炎疫情嚴峻 一文睇晒對香港娛樂圈有幾大影響

「武漢肺炎」疫情持續擴散，中國及世界各地都錄得確診個案，死亡人數更每日不斷上升，搞到人心惶惶，唔少香港市民外出時都戴上口罩自保。各行各業都受到唔同程度嘅影響，而娛樂圈都不能倖免，而家就同大家睇下疫情對香港娛樂圈嘅影響啦！

演唱會取消或延期

為減低社區擴散風險和保障演出者、工作人員及公眾安全，唔少演唱會主辦單位都陸續宣布演唱會取消或延期，當中包括劉德華取消本月15日至28日共12場紅館演唱會、黎明原定上月31日及本月1日澳門演唱會延期、張智霖取消4月嘅紅館演唱會、周杰倫個唱再度延期至11月舉行、張衛健喺2月22日嘅澳門演唱會將延期舉行、楊千嬅喺2月8日嘅世界巡迴演唱會新加坡站延期、周國賢取消4月21及22日紅館演唱會、陳輝陽2月14及15日假旺角麥花臣場館延期、莫文蔚3月紅館演唱會延期及溫拿原定本月1日嘅澳門演唱會延期等等。

《2020國際中華小姐競選》延期舉行

無綫喺上月尾宣布為顧及佳麗、職藝員及觀眾嘅健康安全著想，原定今個月15日舉行嘅《2020國際中華小姐競選》延期舉行，而日期及時間將會另行通知。

電影全面停工及延期上映

喺今個農曆新年檔期，唔少內地戲院暫停營業，內地賀歲片全撤檔。另外，唔少製作中嘅電影亦全面停工，當中包括王晶執導，林峯及文詠珊主演嘅《倚天屠龍記》、劉偉強執導嘅《冰雪長津湖》及甄子丹主演嘅《極地搜救》。

藝人登台煞停

聖誕至農曆新年一向都係藝人賺錢嘅好時機，唔少香港藝人都鍾意北上登台搵真銀，不過由於疫情持續，令到唔少活動臨時取消，例如馬國明、麥玲玲及劉鍚賢等等。