林峯迷重提7次好愛吳千語事件 張馨月發火：不要逼我說出7愛真相！

喺上年除夕，林峯宣佈同內地模特兒女友張馨月拉埋天窗，之後又傳出張馨月有喜，由於佢哋結婚結得太過突然，一班林峯粉絲難以接受，更將張馨月同林峯舊愛吳千語作比較。噚日張馨月喺IG限時動態玩你問我答，唔少林峯迷上去踩場，當中亦不斷挑釁，張馨月最終都忍唔住同林峯迷正面開火，充滿火藥味。

有網民重提2013年林峯喺鏡頭前講7次好愛千語BB事件，認為林峯愛吳千語比較多，峯嫂張馨月回應：「求求你們不要逼我說出7愛真相，我會爛在肚子裏的。我說了，我知道的事不少，我不說而已。」

之後，網民認為張馨月係吳千語嘅代替品，二人連英文名都差唔多(吳千語Kerena，張馨月Carina)，峯嫂張馨月回應：「大姐，英文名這事要說多少遍，巧合，我有辦法？」

網民亦針對佢曾做車模及內衣模特兒，張馨月回應：「你們對拍攝內衣工作的模特兒有職業歧視」及「你當我是你？濫交說你自己吧！」等等。

喺整個問答過程中，網民有好多尖酸刻薄言論，例如叫張馨月「死全家」；又叫佢如果大肚，行路要小心啲；「做咗咁多衰嘢天有眼」；又話佢鍾意扮吳千語等等。

張馨月都冷靜回應，並表示唔希望自己出現喺其他人嘅新聞，反之亦然，仲話林峯只想專注工作。張馨月亦提到林峯對自己、自己家人都非常好，每日收工都會跟自己視像對話，大讚林峯。