【曾11次提名視帝】「陪跑王」馬國明獲鄭嘉穎教路爭獎

每年年尾，都係無綫派發藝人成績表嘅時間，而視帝視后花落誰家都係大家最關心嘅事。今年嘅視帝大熱人選有《金宵大廈》陳山聰、《鐵探》袁偉豪、《解決師》王浩信、《十二傳說》蕭正楠及《白色強人》馬國明等等。現年45歲嘅馬國明，喺無綫效力20年，2005年首次獲得最佳男主角提名，至今已經獲提名11次，不過可惜失落而回。屢次陪跑嘅佢，被網民封為「陪跑王」。近日有報道指一向與世無爭嘅馬明，近日得到契哥鄭嘉穎嘅教路，開始醒覺，仲積極爭獎添呀！

馬明主演嘅《降魔的2.0》、《飛虎之雷霆極戰》及《C9特工》都先後被無綫抽起，報道就話馬明知道《降魔的2.0》因為後製趕唔切，所以做唔到今年嘅台慶劇，不過佢就冇咩所謂，覺得今年播唔到就下年播。不過馬明身邊嘅兄弟就一直戥佢唔抵，認為佢應該要爭取。除咗因為今年嘅對手唔算太強之外，馬明喺《白色強人》飾演嘅唐明醫生深受觀眾及網民歡迎，所以一班兄弟都覺得佢係時候要攞獎。

另外，報道指馬明同無綫嘅經理人合約喺下年約滿，呢兩個月無綫想傾續約，想馬明快啲簽約，不過一向聽話又踏實嘅馬明就一反常態，成日都話唔得閒，疑避開高層拒談續約。馬明態度突然轉變，其實後面係有鄭嘉穎教路，鄭嘉穎同馬明因合作《鐵馬尋橋》結緣，自此馬明遇到難題都會問鄭嘉穎嘅意見。今次鄭嘉穎都有俾咗好多意見，除咗話睇下出面嘅世界都唔係一件壞事，仲叫佢要慢慢諗清楚，所以有傳佢唔想咁快決定，諗住過咗頒獎禮先決定去留。

努力工作嘅馬明，多年嚟都有唔少經典角色，例如有《鐵馬尋橋》顧汝棠、《On Call 36小時》「一件頭」張一健、《宮心計2深宮計》任三恕及《降魔的》馬季等等，除咗深受愛戴之外，佢嘅演技亦被肯定。前年佢憑《降魔的》馬季成為大熱門人選，觀眾及網民都力撐佢做視帝，不過可惜大熱倒灶。今年馬明再次遇上宿敵王浩信，唔知可唔可以打破「陪跑王」嘅宿命呢？