收視有回落跡象 回顧《愛·回家之開心速遞》高山低谷

無綫處境劇《愛·回家之開心速遞》比起好多劇集更受歡迎，當中當然曾經有起有落，不如而家一齊睇吓佢走過嘅高山低谷。

《愛·回家之開心速遞》係《愛·回家》系列嘅第四輯，由2017年2月開始播出。劇集初期龍璟風（陳浚霆飾）以鬼魂姿態出現，寄居於熊家之中發生嘅故事，後來因為陳浚霆離開無綫嘅關係，鬼魂故事告一段落，但當時就被網民批評失去原有嘅神粹。

劇中亦不乏愛情線，而且亦成為劇裏面嘅一段高潮。「大小姐」龍力蓮（林淑敏飾）同「送水輝」宋端輝（許家傑飾）一段地下情就真係可歌可泣啦！兩個由地下情直至大小姐放棄一切事業地位，都要同送水輝一齊愛得轟烈。佢哋嘅受歡迎程度真係唔可以睇少呀！

金城安（周嘉洛飾）同譚育英（林凱恩飾）呢一對情侶檔，當中穿插嘅笑料就更加多啦！譚育英父親譚道德（陳榮峻飾）真係笑料百出，好似金城安去到譚家屋企進行「再教育」，點知譚道德反被金城安直播裸體及破壞家中物品。

熊若水（呂慧儀飾）先有與秦博思嘅曖昧關係，到而家與龔燁（張景淳飾）嘅情侶關係，但點都唔夠呂慧儀同張景淳疑似戲假情真咁轟動。

另外，《愛．回家之開心速遞》亦不時有外援相助，就好似早前嘅歐陽震華咁，佢同群姐《波比與群姐的前世今生》就超過30點收視。

熊樹根（劉丹飾）、龍敢威（羅樂林飾）、馬豹（黎彼得飾）及譚道德（陳榮峻）組成「大四喜」參加《香港齊Hip Hop》，一時之間令到「大四喜」街知巷聞。

雖然《愛·回家家之開心速遞》的確係受歡迎，但係都曾經經歷過低潮。首推係因為原先嘅主題曲由黃心穎主唱嘅關係，但「安心事件」發生後，網民連黃心穎把聲都唔想聽到，仲話如果唔停播佢首歌就會罷睇。無綫立即順應民意將歌曲下架，改播純音樂。之後仲搵咗劇中主要演員合唱主題曲。

除咗最初期龍璟風離開引起不滿之外，其實劇集中途都有多位藝人突然離開劇組，亦令到觀眾莫名其妙大呼冇癮！例如有「博士」秦博思（馬貫東飾）、「Mandy」林美香（謝㺭圻飾）、「欣欣」侯蔡欣（邵珮詩飾）、「傻強」陳伯強（馮奕森飾）及「Miss Tong」湯圓圓（楊秀惠飾）等等。

早前，無綫嘅收視滯後報告「8月5日至8月11日」出爐，多個節目都收視下跌，三線劇集全部唔過24點。連《愛•回家之開心速遞》嘅收視都係得23.8點，係呢套劇集接近年半嘅最低紀錄。劇集收視有回落跡象，睇嚟編審人員要加倍努力啦！