「慳妹」楊秀惠作客《星級理財個案》 與周家蔚李思欣成為好姊妹竟然因一個特價茶餐？

Yahoo首個結合娛樂及理財概念嘅全新節目《星級理財個案》已經正式首播啦！節目由Yahoo首位虛擬網紅Yahwoo做主持，而楊秀惠更成為首位嘉賓，節目中除咗講佢喺初入行時點樣渡過拮据嘅時刻之外，佢仲講咗同周家蔚及李思欣嘅姊妹情，同埋佢嘅理財之道。

喺一開始，節目就講到楊秀惠喺20歲嘅時候，隻身去到香港為事業打拼，入行初期更遇上拮据嘅時刻。楊秀惠就話初期真係比較辛苦，因為佢要慳錢，每一日唔可以用超過一百蚊。所以佢就同好朋友周家蔚同李思欣講佢淨係可以食某一間餐廳嘅下午茶，楊秀惠唔想餐餐都係佢哋請，只係想佢哋陪佢食比較平嘅嘢。而周家蔚同李思欣就好好咁陪佢，正正因為咁佢哋就成為好好嘅朋友。

之後，楊秀惠亦講到馬來西亞及香港嘅物價差別，好似佢初初嚟到香港嘅時候，佢去商場買衫，但係竟然要二、三百蚊一件，但係馬來西亞就一定唔使咁貴，嗰時佢覺得香港所有嘢都好貴，所以佢喺花錢之前都會計一計，之後先至夠膽買。

Yahwoo亦趁機問下佢屋企人有冇催佢結婚，不過楊秀惠就話屋企人都知道藝人都比較遲婚，同埋亦都知道結婚係唔可以強求，遇到啱嘅人好多嘢就會自然發生。

最後，楊秀惠就分享一個理財小貼士俾大家，就係記低自己嘅花費，因為如果你冇記錄低嘅時候，你就會用多咗錢。所以只要有記低自己嘅花費嘅習慣，久而久之就會知道自己花咗幾多錢，咁樣就可以知道自己可以喺邊一度慳錢。

想知新一代「慳妹」係點樣鍊成嘅話，快啲click下面嚟睇㗎！