【情人節快樂】重溫近年無綫劇集經典螢幕情侶

多年嚟無綫創造咗唔少螢幕情侶，當中有甜蜜嘅，有虐心嘅，唔知邊一pair最令你留下深刻印象呢？趁住今日係情人節，而家就同大家重溫一下近年無綫劇集嘅經典螢幕情侶啦！

王浩信喺劇中飾演超級暖男Saving ，佢對Cherry（唐詩詠飾）無微不至，真係冧死唔少女觀眾。雖然佢哋最終未能開花，但已經成為網民心目中嘅最佳情侶。

以穿越時空作為題材嘅《EU超時任務》大受觀眾歡迎，相信大家仍然記得「芬機粒」同埋「屎渠頭」。唔少人都覺得渠頭（王浩信飾）重情重義，對阿風（朱千雪飾）好深情，佢最後為咗救返阿風，寧願忍受阿風唔記得佢嘅痛苦，選擇再次穿越返到去4月1號，一班網民都話睇到眼濕濕。

上年出街嘅穿越懸疑劇《金宵大廈》，大受觀眾歡迎，成為網上熱門討論話題，更被譽為「神劇」。舞廳大班CoCo／空姐Alex（李施嬅飾）及警察旭輝／看更阿蕭（陳山聰飾）呢段穿越兩代嘅愛情故事，初頭都係浪漫甜蜜，但最終都係相愛但不能在一起，唔少人都戥佢哋感到惋惜。

一個失婚婦人配上一個二世祖，原本只係租出房間減輕租金負擔，但到最後竟然日久生情。周柏豪飾演嘅暖男Oppa浩田，雖然被人公認只係靚仔，做人冇乜計劃，但之後遇上要重新振作嘅藍飛（楊千嬅飾）。浩田經常為佢遮風擋雨，仲對藍飛兩母子照顧有加。除咗成功俘虜「姐姐」藍飛之外，仲冧到唔少女觀眾。二人初時望落唔太合襯，不過二人憑行動證明一段感情，年齡絕對唔係一個問題。

冷凍人爺爺鍾定國（陳家樂飾）同Aki（林夏薇飾），由工作上嘅冤家，慢慢到互相欣賞而相愛，有情人終成眷屬。雖然爺爺再次被冷凍醫治延長壽命，但都係同Aki共度5年嘅幸福快樂嘅時光，之後就離世，未能白頭到老。

早期大小姐（林淑敏飾）親自寫《初戀無限feel》劇本，決定要同送水輝（許家傑飾）發展一段冇階級觀念嘅感情。大小姐最終選擇愛情，放下身段兼放棄埋家族生意，現時就喺送水輝嘅酒吧「好爸Bar」做老闆娘。

「龔水CP」呢一對歡喜冤家，關係時好時壞，由曖昧到開花結果。上年佢哋喺白色情人節開始拍拖，唔少人睇到都覺得好甜蜜。除咗劇內非常合襯之外，佢哋仲多次被傳出戲假情真。

親子劇《親親我好媽》題材貼地有共鳴，除咗飾演虎媽嘅江美儀之外，江嘉敏及何廣沛飾演嘅Venus同Hayden同樣搶鏡。Venus同Hayden自細青梅竹馬，Venus仲暗戀Hayden，當中Venus向Hayden表白嗰一段，更喺社交網站瘋狂洗版，唔少網民都大讚佢哋演出自然，同埋令佢哋緬懷返讀書時代嘅青澀戀事。

有一種愛情叫拳佬與刁蘭，刁籣（胡定欣飾）與拳佬（陳展鵬飾）初頭係老闆娘同夥計嘅關係，雖然刁籣原本係喜歡牙佬（袁偉豪飾），不過佢哋後來排除萬難發展成為情侶，仲試過一齊離開城寨。唔少網民都對呢一pair吵吵鬧鬧嘅愛情非常受落，佢哋仲憑住呢套劇贏得視帝視后寶座。

牙佬（袁偉豪飾）經常喺路邊攤等待，目的就係想同花曼（王君馨飾）食豆芽湯。之後，佢哋幾經辛苦終於喺埋一齊，可惜後期花曼被殺手組織嘅人殺死，留下牙佬一人，真係睇到心都痛埋呀！

外形合襯嘅伍允龍及劉佩玥，係劇中嘅愛情故事非常可歌可泣。「貓仔」龍成虎（伍允龍飾）職責係保護柯德莉（劉佩玥飾），期間一次嘅英雄救美，令佢哋牽出紅線。可惜貓仔最終被奸人所害，令佢哋陰陽相隔。