【年尾盤點】今年無綫十大搶眼奸角 個個令人咬牙切齒！

2019年話咁快就差唔多完結，呢一年入面嘅無綫劇集中誕生唔少令人印象深刻嘅奸角，呢班演員將奸角角色演得出神入化，睇到觀眾咬牙切齒。而家就同大家重溫一下今年有邊10位搶眼奸角啦！

李天翔喺劇中飾演進興龍頭大佬蔣滔（羅樂林飾）個仔「太子」，一出場做乖乖仔一名真係呃盡所有人，自細就跟住爸爸周圍去。不過從黑社會家庭長大，正所謂「人越大，邪念越大」，每件事做俾人睇係幫爸爸，但根本處心積慮想做龍頭之位，擁有話事權。佢除咗幫爸爸搞毒品生意之外，亦自己另起爐灶呃公司錢，過程中更經常害親生妹（唐詩詠飾）。今次呢個角色經常以西裝示人，唔少人仲讚佢型過男主角王浩信，原來今次係佢離巢之作，都可以話係畫上完美句號。

為求不擇手段都要搶到自己想要嘅野，就算要犧牲身邊同僚性命亦冇所謂嘅警隊高層萬晞華Madam Man。佢貪權、好勝、心狠手辣又自私，為咗做一姐可以去到好盡，佢除咗背棄並槍殺臥底下屬Bingo（姜皓文飾）之外，佢仲犧牲埋兩個仔（洪永城及楊明飾）及身旁同僚嘅性命，真係睇到人想打爛部電視！最終佢失去事業同家庭，得唔到佢渴望嘅一姐地位，一無所有。

越南黑幫老大「營長」鄧明陽殺氣十足，就算零對白都好，佢都用佢對兇惡眼神去交戲。為人心狠手辣唔留手，除咗係黑幫老大同時亦係高智商犯罪集團首腦！除咗係Madam Man嘅殺子仇人之外，佢仲綁架劉彤彤（黃學盈飾）、炸傷谷永正（梁競徽飾）、殺死江麗瑤（何佩珉飾）及陸蔚喬（蔣祖曼飾）等等。壞人當然惡報，佢最終被程宇森被捕及被判終身監禁。

高級總警司「賤Kan」簡國曙，為求上位，做盡壞事。經常收集唔同情報，為錢將重要情報交俾其他人，同Madam Man一樣為求得到自己想要嘅嘢而不惜一切。賤Kan平日有功自己立，有鑊就下屬負責。為咗靠向Madam Man，不斷出賣身邊人，包括出賣程Sir（黃智賢飾）及前妻Carrie（陳敏之飾）。

喬百川表面溫柔體貼，但原來隱藏好多冇人知嘅黑暗秘密。佢為人陰險，除咗多年禁室培慾魏素嘉（陳瀅飾），佢仲為咗向洋人報復，培養素嘉做交際花，令素嘉受盡煎熬。望落係一個好男人，但其實係一個社會敗類，最後佢被魏素嘉殺死及開膛，仲被埋屍沙灘。

貪污腐敗嘅華探長「文雄」，職位越高野心越大。佢喺劇集設局陷害龍四（鄭則士飾）坐監，更要搶對方女朋友方百合（張慧儀飾）。警界中隻手遮天及做盡壞事。唔單止自己做盡壞事，仲要帶同一班手足到處蝦蝦霸霸，最終佢因為受賄而被廉署拘捕及入獄。

馬志威喺劇中飾演殺手「螳螂」，佢冷血又貪心，呃自己師傅唐偉（黃栢文飾）財產後冷血咁殺害佢，仲棄屍於海，要俾人知道「有徒弟就冇師傅」呢個道理，壞事做盡嘅螳螂，最後吞槍自殺。男模出身嘅馬志威，大家對佢個名可能有啲陌生，不過佢憑住「螳螂」一角成功入屋。

雖然李家聲飾演嘅狗強戲份唔多，不過令人心寒嘅指數就爆晒燈。喺單元「異夢」中，狗強為咗逼問贓款下落，佢不惜殺死雯雯（李綺雯飾）、莎莎婆婆（羅蘭飾）及切下芳芳（尹詩沛飾）耳仔及強姦莎莎（阮兒飾）。壞事做盡嘅狗強，最終不得好死，同贓款一齊跌落樓，及變成火燒人。李家聲眼神既兇恨又可怕，簡直令人有毛骨悚然嘅感覺。

一向被人批評演技嘅洪永城，今次喺《大帥哥》嘅表現終於有進步。劇集嘅馬炭（洪永城飾）擁有雙重人格，一時溫柔和善，一時控制唔到情緒到要殺人咁款。「黑化」嘅佢冷血又殘忍，想取代大帥哥（張衛健飾）嘅位置，除咗殺死麥先根（彭懷安飾）、佘南（古明華飾）、李細龜（張達倫飾）及葉天嬌（譚凱琪飾）之外，佢仲不念舊日情將好兄弟羅義（徐榮飾）槍殺，睇到令人咬牙切齒。佢後來被狄奇及章沅婉（蔡思貝飾）感動而悔改，可惜與狄奇聯手炸死蒙大同（蔡國慶飾）時，不幸地被炸死。

譚凱琪喺劇中飾演日本間諜葉天嬌，佢雖然背負住國家嘅間諜任務，不過就深愛「大帥哥」狄奇，一直希望能夠真正成為佢嘅最愛。喺進行任務嘅時候，天嬌其實係可以將大帥府嘅所有人殺死，但佢都選擇留手。最後天嬌選擇愛情，更被大帥哥阻止切腹謝罪及原諒，不過可惜被馬炭槍斃。