【大結局劇透】譚俊彥《十八年後的終極告白》西裝顏色睇變化 網民大讚交到戲

無綫懸疑劇《十八年後的終極告白》劇情緊湊有張力，劇中一班演員嘅發揮亦非常出色，獲得唔少網民支持及大讚，口碑非常不俗。劇情噚晚就講到阿倩（楊秀惠飾）被棺材（何啟南飾）同埋反骨仔泰臣（羅浩銘飾）綁架，阿一（陳山聰飾）為救阿倩與棺材鬥車，棺材葬身火海，而泰臣亦被阿一用爛玻璃樽插傷。另一方面，阮進（林嘉華飾）不斷追查仔仔及老婆嘅死亡真相，仲查到Sam（譚俊彥飾）好有可疑。而阿Sam為咗賺快錢，可以盡快同阿瑾（黃智雯飾）離開香港，佢被迫參與曹伯晟（曾航生飾）嘅做假數項目，最後仲被商業罪案調查科調查。劇集唔經唔覺喺今晚就會播出大結局，

譚俊彥身為主角，今次喺劇中飾演會計師林朗生Sam，原本係一個唔讀書嘅學生，自18年前埋屍後，佢就努力發奮，仲成為一個忠忠直直嘅會計師。不過骸骨喺18年後被意外發現，「第八人」始作俑者賴國明（唐嘉麟飾）更現身。Sam好驚賴國明告發自己，所以因自衞反抗時錯手殺死賴國明，喺放火焚船毁滅證據時，意外將淑嫻（江欣燕飾）燒死埋。「黑化」後嘅Sam，為掩飾秘密，不惜大話冚大話，去到今晚，阮進與Sam相約喺十八年前兇殺案嘅舊校舍見面，阿一趕到意圖阻止Sam一錯再錯，不過殺人唔眨眼嘅Sam將會再次殺人，仲要係殺死好朋友阿一。而喺接受傳媒採訪時，譚俊彥已經透露阿Sam將會坐監，為自己做過嘅事負責。

睇過譚俊彥嘅演出後，唔少網民都大讚佢做得好好、眼神表情交到戲及演繹立體等等。其實譚俊彥喺造型上都有花心思，大家可以從西裝顏色睇到佢嘅變化。喺劇集初期，佢係身穿淺色西裝，黑化後就穿著深藍及黑色嘅西裝。