【千呼萬喚】馬國明終於開IG！唔夠一日已經超過4萬追蹤者

馬國明嘅生活一向非常低調，除咗2018年開咗一個微博帳號之外，佢就冇再有任何社交平台，所以亦被稱為社交平台「絕緣體」。不過喺噚日馬明終於開設IG帳號啦！短短12小時之內就已經吸引咗1.8萬粉絲追蹤，去到今日下晝3點幾亦已經突破4.2萬粉絲，認真係勢不可擋！

噚晚大概10點，佢就post咗第一張相（不過其實呢幅相之前已經喺微博分享過），之後佢就寫到：「新開始……我係 馬國明。」呢個post一出，一班粉絲當然非常興奮，紛紛留言話：「等左二千幾年 為左今日😂😂」、「小馬終於有IG, 多謝豪仔/石敢當報料🤗💚」、「哇…終於等到你啦………奇蹟啊」、「竟然見證到馬明開ig , everything is possible🤣」及「你終於都肯開😂😂識唔識用😏」等等。而佢嘅一班藝員朋友見到佢終於開IG亦非常開心，《降魔的》拍檔何遠東：「邊個感化佢？」、湯洛雯：「Omg」、蔡思貝：「呢個新開始，帶比呢個世界好多希望！將不可能變成有可能!!!! 😍🔥」、陳敏之：「叻仔」及岑麗香：「What the heck!!! You’re finally here!!」。

除咗佢嘅post外，一班粉絲當然最緊張佢會追蹤咩人啦！去到現時為止佢只follow咗26個帳號，近乎全部都係圈中人，其中包括前女友胡定欣、藝人夫婦黃翠如、蕭正楠、羅仲謙、楊怡、陳凱琳、鄭嘉穎，仲有「鐵馬家族」成員林子善、黃嘉樂以及「契妹」唐詩詠、當然亦有《降魔的》系列嘅拍檔黃智雯、何遠東、胡鴻鈞、譚嘉儀，以及其他圈中好友如黎諾懿、高海寧、佘詩曼、岑麗香、李施嬅等等，不過另一位前女友黃心穎就未見蹤影。