《十二傳說》正在熱播中 重溫無綫經典靈異劇集

由蕭正楠、林夏薇、劉佩玥及張穎康等人主演嘅靈異劇集《十二傳說》，劇集以香港都市傳說為題材，講述記者傅子博（蕭正楠飾）、民俗學教授潘朵拉（林夏薇飾）及警察易銘賢（張穎康飾），一齊調查香港發生嘅奇案奇事，例如新娘潭、榕樹精及狐仙等等，成功吸引一班鍾意鬼靈精怪嘅觀眾收睇。其實過往無綫都有唔少以奇異靈幻做題材嘅劇集，今日就同大家數一數有邊套啦！

如果要數最經典嘅無綫靈異題材劇集，相信唔少人都會話係《大鬧廣昌隆》，劇集由周海媚、林家棟、郭少芸及陳啟泰等人主演，故事講述許大廣（林家棟飾）喺機緣巧合下，放咗長年寄居於紙傘內嘅女鬼小芙蓉（周海媚飾）出嚟，後來佢哋一齊尋找殺死陸運廣嘅兇手。周海媚憑著小芙蓉一角爆紅，成為無數男士嘅夢中情人。

由羅嘉良、佘詩曼、江華及向海嵐主演，劇集以七姊妹道傳聞為背景，講述謝子堂（羅嘉良飾）與歡喜冤家黃玉簪（佘詩曼飾）遇上留喺人間15年嘅女鬼秋娟（ 向海嵐飾），秋娟哀求佢哋幫佢搵返一封十二年前寄失嘅信，並同二人講咗佢同繆蓮仙（江華飾）一段可歌可泣的愛情故事。最後尋回原先約定殉情嘅情郎繆蓮仙，秋娟能夠同另外六位姊妹重聚。

由陳妙瑛、向海嵐、張兆輝及魏駿傑主演，劇集喺播出嘅時候被安排喺倉底劇時段播出，不過仍然獲得最高收視37點幾佳績。劇集講述淩雲（向海嵐飾）自細同爸爸（許紹雄飾）相依為命，仲有一個好好嘅朋友楚楚（陳妙瑛飾）。不過淩雲唔想出嫁離開爸爸，所以佢故意扮醜。不過有一次淩雲無意中救咗微服出巡嘅皇帝（張兆輝飾），之後皇上就想接佢去皇宮及納佢為妃，可惜楚楚就妒忌淩雲，而哀求蕭濤（魏駿傑飾）幫佢同淩雲換臉，頂替淩雲入宮做妃子。其實呢套電視劇概念來自電影《Face off》（奪面雙雄），互換面容改變之後嘅故事。當年換臉嗰一幕嘅電腦特技雖然麻麻，不過仍然令觀眾留下深刻印象。

由陳豪、田蕊妮及胡定欣主演嘅《鬼同你OT》，劇情主要講述孫淑梅（田蕊妮飾），唔單止失去工作，仲因一個意外用手機電死咗姜蓉（胡定欣飾）。點知喺一年後孫淑梅用電死姜蓉嗰部手機時，發現姜蓉嘅鬼魂依附係手機裏。之後姜蓉同佢形影相伴，仲幫佢重回公司，幫米開朗（陳豪飾）完成建築作品。喺呢個過程中，人鬼之間竟然結下了深厚情誼。劇集最令大家深刻嘅一定係胡定欣及田蕊妮嘅神同步，佢哋仲分別獲得萬千星輝頒獎典禮2015中最佳女主角及最受歡迎電視女角色。

劇集由歐陽震華、滕麗名、胡定欣、羅蘭、胡楓等主演，講述父親寶祿（劉江）突然中風逝世，寶歡（歐陽震華飾）為咗完成父親團結家人嘅心願，所以佢偽造遺囑指同細佬妹喺大屋住滿九個月先可以將大屋出售，點知大屋住咗一對「老友記」白樺和依蘭（羅蘭及胡楓飾），佢哋由初頭嘅敵對，去到為寶家排難解紛，期間鬧出唔少笑話。劇集口碑同收視都好好，更帶挈童顏張彥博人氣急升。

《古靈精探》由郭晉安、郭羨妮、馬國明及曾華倩主演，劇中主要講述幹探于子朗（郭晉安飾）因一次意外，擁有咗通靈能力，可以感應死去冤魂傳遞俾佢嘅資訊。呢個能力仲令佢屢破奇案，之後仲被調到「特別兇案調查分部」，專查一啲奇怪案。劇集播出嘅反應好好，所以無綫亦將原先被安排意外死亡嘅于子朗翻生，同刑晶晶（郭羡妮飾）繼續有情人終成眷屬。

由錢小豪、鄭秀文（Sammi）、黎耀祥、關寶慧及楚原等人主演，劇集好有80年代《殭屍先生》風格，以殭屍為主題，主要講述晚清時期捉鬼大師張可以（楚原飾），帶著徒弟張北平（錢小豪飾）和張南京（黎耀祥飾）遠赴香港。為咗生計，北平和南京做咗警察，後來殭屍禍害人間，張北平請求師父張可以重出江湖為民除害。而Sammi喺劇中更一人分飾兩角飄紅和飄雪兩姊妹，對於當時嘅Sammi嚟講真係一大挑戰。

由吳啟華、關詠荷、苑瓊丹和鄭子誠主演嘅《全院滿座》以60年代的「東城戲院」為背景，「東城戲院」位置原本係一間殯儀館，因此經常傳出靈異故事。周秀英（關詠荷飾）喺好朋友介紹下去咗戲院售票員，當時秀英認為戲院有鬼，所以令到戲院少東程浩然（吳啟華飾）不滿。不過佢哋之後發現戲院真係有鬼，而呢隻鬼就係「馬姐」張銀仙（苑瓊丹飾）。銀姐仲去咗秀英屋企，後來仲人鬼互相扶持。劇集開頭有搞笑劇情，不過結局極度催淚，算係無綫少有嘅結局。