【勢均力敵】邊位視帝大熱門係你心水？

《萬千星輝頒獎典禮2019》就嚟舉行啦！除咗大量花邊新聞之外，其中最受人注目嘅就梗係視帝啦！幾位大熱門嘅劇集都已經相繼播出，邊個係你嘅心水呢？

馬國明嘅演技一早已經得到大眾認同而觀眾緣亦唔錯！私生活檢點，更被網民評為筍盤！不過就可能欠缺咗啲運氣，感情上嘅挫折就唔使再多講，而《萬千星輝頒獎典禮》又從未染指過視帝！只曾三次得到安慰獎性質嘅《最受歡迎電視男角色》！今年馬國明喺《白色強人》飾演唐明醫生，表現穩打穩紮，並未有太大突破性。唔通馬明又會再一次得到《最受歡迎電視男主角》？

袁偉豪都可以話係熱門之中嘅大熱門。《鐵探》本身突破咗以往電視劇嘅框框！電視劇入面惠英紅同姜皓文等除咗演技好之外亦話題性十足。而袁偉豪劇中嘅角色亦有利佢發揮，袁偉豪更為咗《鐵探》Keep fit，六舊腹肌盡現！不過有時要得獎真係要講啲運氣，《鐵探》喺今年四月至五月播出，如果換轉係今年六月後才播出撞正現今社會環境，就算套劇幾好睇都冇用！

《解決師》集合咗多種元素，就好似為攞獎而度身訂造！作為主角嘅王浩信喺劇中有大量動作場面，但始終王浩信未有太大突破。而且王浩信近年亦受到同陳自瑤婚變嘅傳聞影響形象，再奪視帝有難度！

《十二傳說》講述唔同嘅都市傳說，本來都真係幾吸引。無奈接住播出劇風類似嘅《金宵大廈》口碑更好，咁就直接影響咗《十二傳說》中蕭正楠爭奪視帝嘅機會啦！雖然蕭正楠無論人緣同觀眾緣都非常好，而且都算係一個多棲藝人！不過同獎項就冇乜緣份。唔緊要啦，今年五月佢嘅婚禮已經係最大嘅獎項啦！

《金宵大廈》播映之前就因為演員陣容較弱被稍為看淡！但播出之後無論劇情以至演員都獲得一致好評！主角陳山聰飾演嘅保安員俾到觀眾驚喜！不過陳山聰俾人感覺仲未去到視帝級數！作為一隻冷門馬還可以。不過陳山聰喺11月就會同拍拖五年嘅圈外人成婚，唔知陳山聰會唔會喺2019年尾雙喜臨門呢？