傳暗撻何猷亨出海開P密會 馮盈盈8字回應戀聞剖白關係

現年25歲嘅前港姐冠軍馮盈盈（Crystal）嘅感情世界仲精彩過無綫劇，上年宣佈同愛得高調嘅醫生男友Martin分手，雖然今年情人節被影到一齊慶祝而有傳復合，但後來又傳出與無綫猛男主播鄭衍峰傳緋聞，被傳媒影到二人喺除夕拍拖行超市，二人關係疑幻似真。不過馮盈盈近日又俾傳媒發現周末上咗賭王四房公子何猷亨嘅億元遊艇上蜜會，更懷疑佢同何猷亨正在交往中。

報道指遊艇上有廿幾人，江嘉敏亦在場，派對中盈盈同何猷亨經常談天，而何猷亨亦似足男朋友，一直好體貼咁照顧盈盈。不過事件爆出後，盈盈就喺Instagam上載當日派對玩wakesurf嘅照片，仲留言：「Every time I slip into ocean, i learn something new 今年第一次出海，就學到新技能Wakesurf， 識到一班新朋友，又領悟到新道理。」盈盈仲hashtag咗「#起水只有一秒 #無撻着只有撻落水 #緊張到我眼中只有條繩 #要上岸我寧願游水」。

另外，盈盈喺IG story留下八個字「大家真的只是朋友」澄清同何猷亨關係，亦hashtag「#沒有默認#更是否認 請大家不要想多了，不想再添花邊新聞」 。

雖然未知盈盈情歸何處，但何猷亨經常傳出追求港姐及女神，之前有傳過陳凱琳及劉珮玥，後來又指同陳瀅拍拖，不過何猷亨同陳瀅分手後就未有再傳出新戀情。