今年無綫劇集收視排名 會唔會係最佳劇集嘅指標?

2019年即將結束,而《萬千星輝頒獎典禮》亦會推遲到明年一月舉行,大部份劇集經已播放完畢,唔知最佳劇集大家又有咩心水呢?而家咁流行「大數據分析」,收視數字又會唔會比到一啲玄機呢?

第十位:《十二傳說》
第十位:《十二傳說》

無綫劇集嘅題材唔係好多關於靈異奇幻,由蕭正楠及林夏薇主演嘅《十二傳說》播出時叫好但不叫坐,收視只得24.1點排喺第10位。唔通入面嘅故仔老一輩觀眾已經聽到耳熟能詳,後生一輩又嫌唔夠恐怖?

第九位:《好日子》
第九位:《好日子》

由黃智賢、陳煒及張達倫主演嘅《好日子》平均收視有24.2點,沒有包裝,又沒有大上大落嘅情節小品式劇集能夠攞到呢個成績其實已經相當唔錯!

第八位:《荷里活有個大老千》
第八位:《荷里活有個大老千》

由王晶監製加上幾位老牌甘草演員鄭則仕、秦沛及金燕玲等演出嘅《荷里活有個大老千》多個場景都喺內地拍攝。再加上幾位年青一輩演員蔡瀚億、吳業坤、王子涵等,都算係電視劇近年少有嘅高成本製作,不過收視就只有24.3點排第八位。

第七位:《守護神之保險調查》
第七位:《守護神之保險調查》

同樣屬於大製作嘅《守護神之保險調查》,先講陣容有苗僑偉、黃宗澤、劉心悠及徐子珊等等。拍攝地點除咗香港同內地之外,仲有英國、捷克、馬來西亞及斯洛伐克。《守》劇平均收視有25.25點,成績的確令人有少少失望。

第六位:《解決師》
第六位:《解決師》

啱啱播完嘅台慶劇《解決師》由視帝王浩信、視后唐詩詠、陳敏之、張頴康及馮盈盈等人主演,雖然演員陣容唔錯,不過評價就麻麻地。本來有晒一切成為最高收視嘅戲劇元素,但係最後佢嘅平均收視就得25.68點,或者大家已經睇厭咗啲動作場面?

第五位:《牛下女高音》
第五位:《牛下女高音》

另一套剛剛播完嘅台慶劇《牛下女高音》,就因為黃心穎令到劇集差啲冇得播出,但後來照樣播出反而成為一個宣傳點。播出後多位中、老年演員得到嘅評價亦相當之高,劇情亦得到唔少正評。平均收視有25.8點,都可謂喜出望外。唔知黃心穎又會唔會因為呢套劇而有機會翻身呢?!

第四位:《倚天屠龍記》
第四位:《倚天屠龍記》

金庸最值得人尊敬嘅係無論佢嘅小說睇幾多次,都一樣咁引人入勝。《倚天屠龍記》今次由資金比較充裕嘅內地製作單位拍攝,無論場景同畫面質素都非常之高!而喺香港播出得到嘅收視有26.79點,除咗多得金庸嘅功力之外,無綫嘅配音組亦都居功至偉!

第三位:《金宵大廈》
第三位:《金宵大廈》

第三位嘅《金宵大廈》竟然能夠殺入三甲,播出前相信都冇咩人估到。平均收視有27點,由首次擔正嘅陳山聰同已經離開無綫嘅李施嬅主演,劇情夠貼地兼加入唔少懸疑古怪嘅劇情。另外,無論主角或其他配角嘅演技亦得到唔少觀眾讚許,所以話好睇嘅劇集唔一定要大製作!

第二位:《白色強人》
第二位:《白色強人》

運用新穎拍攝手法加上精銳盡出,《白色強人》嘅平均收視有28.64點,攞到呢個成績一啲都唔奇。馬國明同唐詩詠喺劇中嘅愛恨纏綿由劇內去到劇外,當然都係一大吸引觀眾嘅原因。始終香港人都係鍾意睇愛情線多啲!

第一位:《鐵探》
第一位:《鐵探》

最高收視劇集就由都可以話係大熱門嘅《鐵探》以28.85點平均收視奪得!故事內容緊湊,而且一反傳統並非一般非黑即白故事!而裏面亦都有幾位好戲之人,例如惠英紅、姜皓文、黃智賢及許紹雄等等,佢哋嘅對戲亦都成為公眾討論嘅熱點。不過好戲之餘亦都需要好運氣,若果播映時間選擇唔好,可能結果就完全唔同!