今年台慶劇集名單流出 《多功能老婆》唔使等到下年就有得睇？

每年11月就係台慶月，無綫亦都即將宣布台慶劇花落誰家。近期有唔同嘅消息傳出，最新有指《多功能老婆》、《黃金有罪》及《解決師》將會成為今年熱推嘅台慶劇。

《多功能老婆》成功邀請闊別無綫劇集17年嘅楊千嬅擔任女主角，仲搵咗周柏豪、黃浩然、朱晨麗、黃錦燊、洪永城、陳煒、吳若希及許紹雄等等主演。早前楊千嬅及周柏豪喺社交網站分別因為一些言論引起內地網民不滿，所以有傳無綫考慮到相關演員嘅新聞及社會局勢，劇集將會押後到起碼下年4月先播出。最近楊千嬅透過經理人公司發出聲明，強調自己愛國愛港及冇支持「港獨」，而周柏豪亦將IG全部貼文刪除。咁啱得咁橋，《多功能老婆》就被放生，有指預計10月中出街。

至於《黃金有罪》，劇集搵嚟張兆輝、蕭正楠、洪永城、黃智賢、姚子羚、何廣沛及陳瀅等人主演，以香港70至80年代嘅香港作為背景，及以股票作為題材，講述榮木桐（張兆輝飾）喺香港嘅「黃金時代」以不擇手段成為巨富，雖然佢最終成為香港首富，不過搞到眾叛親離。另外，時裝警匪劇《解決師》就由王浩信、唐詩詠、陳敏之、張穎康、張曦雯及馮盈盈等人主演，劇情主要講述Karson（王浩信飾）曾經係黑幫殺手，之後脫離黑幫喺學校做體育老師Orson，仲遇上真實身份係黑幫千金嘅音樂老師Jovy（唐詩詠飾），Orson亦因為保護Jovy而再次踏上舊路。

消息仲指《機場特警》、《殺手》原本有機會成為台慶劇，不過因為社會局勢及警民關係緊張嘅關係，所以今年應該會播出無望。至於《降魔的2.0》、《法證先鋒IV》及《極道怪咖》就做緊後期工作。

如果無綫真係安排《多功能老婆》、《黃金有罪》及《解決師》做今年嘅台慶劇，大家有冇興趣收睇呢？