《二月廿九》好評如潮 ViuTV嚟緊有咩自家製劇集？

近期穿越劇大受觀迎，好似有台劇《想見你》、內地劇《慶餘年》及ViuTV劇《二月廿九》。《二月廿九》綜合咗愛情同穿越元素，上星期播出以來討論度爆燈，唔少觀眾都大讚劇集有新意，係近年難得一見嘅佳作，不過劇集喺今晚就大結局。其實近年ViuTV都自家製劇集，等我地同大家睇下嚟緊有咩劇集啦～

愛情懸疑劇《歎息橋》係由《綠豆》班底再次合作拍攝，男女主角仍然都係林保怡和周家怡，講述林保怡細細個已經努力工作，賺取媽媽嘅醫藥費，之後識咗周家怡，二人做咗好朋友並一齊打拼。劇集雲集好戲之人，有陳奐仁、伍詠薇、衛詩雅、Ming Sir劉兆銘以及郭鋒等等。

勵志動作劇《打天下》由歐錦棠、文頌嫻、談善言、MIRROR成員Anson Kong及張建聲等人主演，劇集以空手道為題，仲去到沖繩拍攝外景。劇集講述歐錦棠係空手道高手，不過因為被師兄嫉妒逐出師門，仲淡出空手道界。之後佢喺機緣巧合下遇到談善言、Anson Kong同埋葉麗娜，透過空手道訓練令佢哋三個慢慢建立自我。

黑色幽默劇《地產仔》搵嚟鄭浩南、朱慧敏、余香凝、吳肇軒、胡子彤及廖子妤主演，鄭浩南飾演地產店老闆，余香凝做地產店分區經理，講述地產見習代理嘅辛酸。

青春勵志劇劇《男排女將》有好耐冇拍港劇嘅鄧麗欣（Stephy）、顧定軒、MIRROR成員Ian、Anson Lo及Edan等人參演。劇情講述King（顧定軒飾）及Bobby（Anson Lo飾）因身高未能達標，所以被逐出甲一排球隊，之後遇上前香港女子排球代表隊成員蔣家瑜（Stephy飾）。佢哋令蔣家瑜重新愛上排球，更成為香港第一位男子排球女性教練。

集犯罪、懸疑及愛情於一身嘅劇集《太平紋身店》，搵嚟周秀娜、林德信、柏天男及陳泂江等人主演，劇情主要講述香港太平街隱世紋身店嘅女紋身師Nana（周秀娜飾），佢會根據客人嘅奇幻經歷，然後幫佢哋度身訂造設計紋身，同時Nana嘅神祕身世亦會慢慢揭開。劇集原定喺香港、新加坡及台灣取景，不過因新型冠狀病毒肺炎疫情持續，前往新加坡後要先隔離14日先可以開工，所以ViuTV決定延期拍攝。

青春歌舞劇《搖滾校園》，王貽興除咗公開招募素人擔任女主角之外，仲搵嚟MIRROR拍攝，淨係睇一班小鮮肉都夠晒新鮮感同吸引啦！