《中佬唔易做》首播 張松枝搵工撻朵被cut線 麥長青上堂大膽瞌眼瞓

《中佬唔易做》截圖
《中佬唔易做》截圖

ViuTV真人騷《中佬唔易做》喺噚晚(4日)首播,節目邀請張松枝、袁富華、古明華、麥長青(麥包)、敖嘉年及艾威六位40歲以上喺娛樂圈打滾多年喺「中佬」藝人,嘗試做演員以外嘅職業,體驗唔同嘅工作及其箇中辛酸。

《中佬唔易做》截圖
《中佬唔易做》截圖

喺節目開始,佢哋6個就聚首一堂。麥包期間就問大家幾耐冇工開,佢自己就話完成《C9旅行團》後就冇工作;艾威喺上年農曆新年前就已經冇工開;張松枝喺上年新年拍完《二月廿九》就冇嘢做;敖嘉年就話原本4月嘅舞台劇已經延遲去到9月;袁富華就喺限聚令期間開咗幾日工;而古明華就1月開始冇嘢做,3月仲去咗做切膽手術。

之後,節目嘅重點就落喺張松枝及麥包身上,除咗講佢哋點樣搵工之外,仲有見工所鬧出嘅笑話及訪問佢哋一啲對人生嘅睇法等等。

《中佬唔易做》截圖
《中佬唔易做》截圖

麥包喺節目中話自己冇見過工,因為好多工都係經朋友介紹,而今次呢份工就係前綠葉演員游飈介紹,游飈介紹麥包去物流速遞公司做速遞員。喺正式開工之前,麥包需要上培訓班,佢竟然好大膽咁喺導師面前瞌眼瞓,不過後來發現物流公司老闆同佢係舊相識。

《中佬唔易做》截圖
《中佬唔易做》截圖

另外,麥包被節目組問到錢對佢嚟講有幾重要,佢就話以前佢唔睇重,不過而家就覺得好重要,因為男人要當家。佢嘅家庭負擔越來越重,因為佢啲仔女開始讀大學。近排佢仲覺得有壓力,因為香港以前只要努力就一定搵到飯食,不過佢近期覺得就算你肯努力都未必會有工開。

《中佬唔易做》截圖
《中佬唔易做》截圖

麥包就搵朋友幫手,而張松枝一開始就打算靠自己,佢打電話去應徵業務助理同埋保安員,不過都係失敗收場。喺應徵業務助理時,張松枝好搞笑咁表明自己身份,可能對方以為佢玩電話,結果嚇到即刻cut線。最後節目組出馬,為佢安排電視銷售代表嘅面試。喺見工期間,由於張松枝欠缺相關工作經驗,銷售部經理就問點解要請佢嘅時候,佢就好有信心咁話自己學野好快,唔係有經驗就可以,有時有經驗都可以做得好差。之後佢再大講自己嘅優點,好似語言能力高及溝通能力強。

張松枝被節目組問對中年有咩感覺,佢就好淡然咁話:「冇咩感覺,因為每個人都有自己嘅職位同能力,點解要限定咗自己去到中年就會有危機。」

另外,張松枝去咗石澳拍攝,期間仲講自己對錢嘅睇法,佢就話喺香港生活嘅話,錢係好重要,因為錢係香港嘅價值觀。如果你想喺香港生活得好嘅話,你就要有錢。除此之外,佢仲講述自己嘅入行經過,就係當年佢喺爸爸打工嗰間酒樓食飯,期間遇到有人去拍廣告,對方就俾咗張卡片叫佢去casting,之後就開始做模特兒。張松枝仲話當年做模特兒嘅收入不俗,每次都有1千至2千蚊。張松枝被叫得「MV王子」,當然唔係浪得虛名喇,原來佢曾參與拍攝嘅MV超過一千部。佢喺節目中仲搞笑咁模仿返當年拍MV嘅表情同埋技巧。

《中佬唔易做》截圖
《中佬唔易做》截圖
《中佬唔易做》截圖
《中佬唔易做》截圖