三甲不入又如何 近年發展不俗落選港姐逐個睇

《2019香港小姐競選》喺星期日已經圓滿舉行,10位佳麗為求脫穎而出喺台上努力表現自己,經歷多個環節之後,結果由1號黃嘉雯成為冠軍,而亞軍及季軍分別由5號王菲及8號古佩玲奪得。不過其他落選佳麗都唔使失望嘅,其實近年喺無綫都發掘唔少落選港姐仲發展得唔錯㗎,不如而家就同大家數一數其中幾位啦!

黃智雯
黃智雯

黃智雯(Mandy)喺2007年參選港姐,入圍最後五強。喺入行初期,Mandy都係飾演一啲唔起眼嘅角色,直至《巴不得爸爸...》中飾演蘇鳳蓮而開始被觀眾認識。之後,Mandy嘅戲份亦越嚟越多,好似《搜下留情》嘅鵪鶉妹、《缺宅男女》嘅關二嫂、《On Call 36小時》嘅洪美雪及《巴不得媽媽...》嘅夔懿曦等等。喺2015年嘅《拆局專家》更首次擔正做女主角,晉升成為花旦。有「星期日女王」之稱嘅佢,上年憑《三個女人一個「因」》中飾演患有多重人格症嘅大律師方以因,完美地一人分飾三角,成功勇奪「馬來西亞最喜愛女主角」及「新加坡最喜愛女主角」,成為雙料視后,演技備受觀眾肯定。

林淑敏
林淑敏

林淑敏喺2000年參選港姐,成功躋身五強,不過佢喺比賽後並冇選擇簽約無綫,反而去咗做幕後,幫日本電視台拍旅遊節目。後來佢決定要賺多啲錢,所以簽約無綫做藝人,喺2002年正式開始佢嘅演藝之路,第一套拍嘅劇集就係處境劇《皆大歡喜》(古裝版),佢喺劇中飾演白無瑕,戲份唔多。之後,佢一直都係做一啲唔起眼嘅閒角,多年嚟佢一直默默耕耘,佢終於憑處境劇《愛·回家之開心速遞》飾演「大小姐」龍力蓮一角,唔少觀眾都覺得佢霸氣得嚟又幾搞笑, 仲好鍾意佢同送水輝(許家傑飾)呢一pair,角色成功令佢人氣上升,成功入屋。前年佢憑角色成功入圍最佳女配角,可惜大熱倒灶,當時唔少網民都戥佢唔抵。喺上年,佢終於憑「大小姐」呢個角色眾望所歸,以大熱姿奪得「最佳女配角」。

湯洛雯
湯洛雯

2012年港姐冠軍嘅大熱人選,不過「靚湯」湯洛雯 (Roxanne)最終六強止步。雖然三甲不入,不過Roxanne好快就有份參演處境劇《愛·回家》,喺劇中飾演李思思一角,深受網民歡迎。除咗《愛·回家》之外,大家對佢最深刻印象一定係主持《學是學非》,唔少網民都大讚佢自然唔造作。之後Roxanne都有參演唔少劇集,好似《完美叛侶》嘅Haley、《與諜同謀》嘅Amber、《心理追凶 Mind Hunter》嘅Icy及《婚姻合伙人》嘅郎朝信,更憑《燦爛的外母》首次擔正做女主角,佢嘅表現同樣不俗,成為無綫力捧上位小花之一。

高海寧
高海寧

高海寧(高Ling)喺2008年參選港姐,最終五強止步。擁有驕人身材嘅高Ling,除咗吸引大家注意之外,更為佢帶嚟唔少搵錢嘅機會。不過凡事有得必有失,正正因為性感,限制咗佢唔少幕前嘅演出機會。近年重新打造演員形象嘅高Ling,喺《不懂撒嬌的女人》中飾演田蜜一角,被網民大讚演技,成功擺脫花瓶形象。佢仲終於喺今年播出嘅《婚姻合伙人》飾演Kimchi,首次擔正做女主角添呀!

麥美恩
麥美恩

2011年香港小姐殿軍嘅麥美恩(Mayanne),加入無綫後主力做節目主持,例如《無綫娛樂新聞台》、《學是學非》、《3日2夜》、《粵講粵㜺鬼》、《Ben Sir睇樓團》及《森美旅行團》等等。之後Mayanne仲慢慢司儀之路,為多個無綫大騷擔任司儀。Mayanne一向以傻大姐形象示人,性格爽直又不造作,深受觀眾及網民歡迎,更喺《萬千星輝頒獎典禮2017》揮低朱晨麗、黃心穎及譚凱琪等人,奪得「飛躍進步女藝員」,絕對係實至名歸。

陳偉琪
陳偉琪

2013年港姐第五名嘅陳偉琪(Vicky),與無綫簽約後正式入行。擁有34E魔鬼身材嘅佢,文又得武又得,除咗係豎琴同鋼琴嘅八級高手之外,排球同籃球佢都一樣精湛。入行後,佢嘅演出機會一直唔多,經常都係飾演一啲唔起眼嘅角色,直至佢喺處境劇《愛·回家之開心速遞》中飾演「細龍太」雷珍妮Jenny一角彈出。佢喺劇中惡毒、巴辣又鍾意亂搞男女關係,雖然角色形象唔討好,不過網民越睇越鍾意,佢嘅演技更備受讚賞。