【又走一個】「𡃁妹」李綺雯因政見問題4月離開無綫

近年無綫鬧演員荒，唔少小生花旦及綠葉演員都宣布離巢，最新就有李綺雯（𡃁妹），佢喺2006年加入無綫，一直喺電視圈浮浮沉沉，雖然拍攝多部劇集，可惜都冇咩突出表現，直至處境劇《愛·回家之開心速遞》中社會大佬千金賀碧雲一角，先至令人眼前一亮。不過佢將會喺4月正式離巢，大家以後都見唔到賀小姐啦～

𡃁妹噚日突然喺社交網站話自己待業中：「待業中。幕前幕後歡迎洽談，待應café廚房我都得，如果請嘅話。」李綺雯接受媒體訪問時承認自己間唔中喺IG發表對社會運動嘅個人感受而被無綫雪藏。

李綺雯曾參與反對修訂《逃犯條例》遊行，分享遊行時嘅情況。佢亦都喺遊行中見証了路人為救護車開路及義工執垃圾的情況，甚至喺「連儂牆」前拍照，並寫着：「區分人的，不應該是顏色，而是良知。」多次發表對政府不滿意，鬧爆政府。消息傳出後，唔少網民都喺佢社交網站留言叫佢加油：「本來對你沒有特別感覺的，但偶爾知道你因為政見而離開tvb。想對你說聲加油！做人做事，沒有甚麼比跟隨自己內心更加快樂！」、「支持良心藝人 做自己認為岩嘅事 加油呀」、「此處不留人 自有留人處！恭喜您離開地獄重返人間」及「人靚心更加靚，祝福你」等等。