【出街有望】《機場特警》《十八年後的終極告白》將接黃金檔期播出

無綫8點半及9點半黃金檔期正在播放《法證先鋒IV》及內地劇《慶餘年》，因為新冠肺炎疫情肆虐，所以近排唔少人都選擇減少出街，連帶無綫嘅劇集收視都高咗，好似《法證先鋒IV》首集收視就高達33點，而《慶餘年》首集都錄得最高28.7點收視，成績相當不俗。雖然兩套劇集都播出冇耐，不過早前已經有消息指《機場特警》接《法證先鋒IV》檔3月底出街，而視評人方以文喺社交網站話《十八年後的終極告白》就接《慶餘年》喺4月中出街。

上年因為修訂《逃犯條例》一事令到社會各界討論，亦令警民關係變得緊張，本來喺上年暑假檔期播出嘅《機場特警》亦因此而抽起，一抽就抽咗大半年。劇集由張振朗、蔡思貝、楊明、湯洛雯、黃子恆、朱敏瀚、黎振燁及鄧佩儀等人主演，無綫首次以香港機場特警組做主題，講述佢哋由學堂受訓，去到成為機場特警後嘅生涯。

心理懸疑劇《十八年後的終極告白》本來都係上年播出，但有傳無綫係想避免部分演員老是常出現，於是將劇集抽起，而家暫定緊接《慶餘年》播出。劇集由譚俊彥、陳山聰、黃智雯、楊秀惠、林嘉華、江欣燕及趙希洛等人主演，講述幾名少年爭執之後，其中一名少年意外死去，其他少年為咗掩飾真相將屍體埋藏，但18年後屍體被意外發現。