《花木蘭》無運行 呢頭做完全球首映 轉頭抽起擇日再上

疾病面前人人平等，新型肺炎正式燒到荷里活，連加拿大總理杜魯多太太蘇菲、巨星湯漢斯伉儷、NBA球星Rudy Gobert都確診。結果杜魯多要自我隔離，湯漢斯拍緊嘅《貓王》電影要停工，最佳防守球員令成個NBA球季要叫停，就算侵侵宣佈封關都救唔到幾多。隨住越嚟越多確診個案，好多大型活動及表演節目要取消或延期！

有時電影都有自己條命，由劉亦菲主演嘅迪士尼電影《花木蘭》可謂一波幾折。較早期因為劉嘅撐港警言論，引起網民不滿，發起杯葛木蘭行動。套戲目標係中國票房，億億聲銀紙面前，劉嘅言論又無觸犯美國地區種族歧視、性取向等主流大議題，迪士尼當然懶理女主角政治立場。結果，肺炎一爆，內地全面停工，農曆年開始再無新片上映。

無咗中國咁大個金庫，日本、韓國等亞洲高票房地區亦因為疫情相繼延期，以當年動畫版《花木蘭》嘅受歡迎程度，就算無咗木須龍等經典角色，斷估北美觀眾都買帳，唯有頂硬上照舊3月尾於北美及歐洲地區公映，票房撈得幾多得幾多，點知歐洲部份國家疫情爆發嚴重到要封國！

北美地區早2日先搞咗全球首映，劉亦菲、李連杰、甄子丹等都有出席。幾位疑似由疫區出發到美國嘅巨星相當親民，特別係女主角劉亦菲，現場無人戴口罩都無有怕，繼續同fans玩親密自拍！可惜，首映都做埋，廣告見哂街一樣要抽起！

迪士尼剛剛宣佈因應疫情《花木蘭》將會改期上映，仲未知推到幾時，不過原定嘅3月27日就一定上唔到，戲院做哂預售都要退飛！《花》唔知係咪開鏡無拜神定得罪人多，被廣大怨念影響，一波幾折最後都係要擇日再上映，荷里活鉅製咁多災多難都算罕見！

除咗《花木蘭》外，迪士尼仲宣佈原定4月3日公映嘅《新異變人》（The New Mutants）、4月17日公映嘅驚慄片Antlers全部要改期，至於新映期則未有定案，而定於4月30公映嘅Marvel系列《黑寡婦》暫時未受影響。

各大電影公司將原定本季上映嘅大片推到年尾或更後，《007：生死有時》推到11月、《狂野時速》由今年5月改到下年4月！希望疫情可以盡快受控，各行各業、成個荷里活同戲院業界因為疫情亂哂籠，損失慘重，有排先回到氣！