【童年回憶崩壞？】Barney恐龍都拍大電影！

童年回憶返哂嚟定係嚴重崩壞？90年代極受小朋友歡迎嘅兒童節目《恐龍仔班尼》（Barney & Friends）即將翻拍成真人版電影，由Mattel Films同《訪．嚇》男星Daniel Kaluuya聯合監制。

幫大家回一回帶，《恐龍仔班尼》由1992年開始播映一路做到2009年，以一隻紫色恐龍大公仔班尼聯同幾個小朋友做主角。通常節目一開始佢未變身，會以手抱公仔大細坐埋一邊做佈景，幾個小演員就會討論下日常，好似砌唔個模型咁玩咩好、又或者點識朋友等等，總之集集有不同疑問，班尼每每喺小朋友不知所措時變成放大版兼識行識講嘢，用唱歌跳舞嘅形式幫小朋友解決問題！

話哂俾小朋友睇，所以一定係happy ending，同以「I love you，you love me」收場，小童內心純潔，所以班尼之於小朋友簡直係幻想成真，好似自己啲公仔真係識講嘢同會倍自己玩。成年後再睇班尼又別有一番滋味，因為一睇就知佢係人著公仔衫扮嘅，而且班尼永遠得1個眼瞇瞇笑笑口表情，集集同啲小朋友攬嚟攬去，又成日唱啲big ball、small big嘅歌，其實有幾分似……金魚佬。

不過今時今日少啲橋都玩唔到翻拍，照辦煮碗搬上銀幕一定失敗。依家嘅小朋友咁有要求，相信要落唔少諗頭先可以食到懷舊條水同吸引到新觀眾群！Mattel Films銳意將著名玩具品牌帶入電影世界，公司其他出品包括同華納合作，由「小丑女」Margot Robbie擔正嘅Barbie電影以及Hot Wheels風火輪玩具車，排住隊上大銀幕仲有UNO牌、The Magic 8 Ball及Master of Universe電影! UNO點拍電影版呢？真係比起出完draw 4可唔可以出draw 2更值得討論。

《恐龍仔班尼》無同任何大片廠合作，不過Mattel Films好有信心可以幫班尼更上一層樓，成為新一代小朋友icon，單係班尼會以咩形式出現，公仔裝定係全CG製作，已經令人相當好奇！到底班尼電影版會帶嚟美好回憶定成為極度崩壞系列，請各位拭目以待。